Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 240 Hüküm no: 269 Orijinal metin no: [50a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tanaş v. Ergiri’nin mülk bağını Ergiri v. Keyoflo’ya sattığı Vilâyet-i Rum[eli’nde] Kartine kazâsına tâbi‘ Estemniçe? nâm karye sâkinlerinden Tanaş v. Ergiri nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Ergiri v. Keyoflo nâm zimmî mahzarında bi’t-tav‘i’s-sâf ikrâr ve takrîr-i kelâm edip karye-i mezbûre hudûdu dâhilinde vâki‘ bir tarafdan Panayot v. Androsa nâm zimmî bağı ve bir tarafdan Lambo v. Yorgi bağı ve bir tarafdan bâyi‘-i mezbûr Tanaş bağı ve bir tarafdan tarîk-i âm ile mahdûd bir dip incir ağacı ile tahmînen sekiz çapalık mülk bağımı cemî‘ tevâbi‘ ve levâhıkı ve âmme-i menâfi‘ ve merâfıkı ile mezbûr Ergiri’ye kırk beş kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ eyledikden sonra semeni olan meblağ-ı mezbûr kırk beş kıt‘a riyâlî guruşu yedinden bi’t-tamâm ve’l-kemâl ahz u kabz edip zikr olunan bağı mahallinde kabza mezbûr Ergiri’yi taslît eyledim ba‘de’l-yevm mârrü’z-zikr bağ mezbûr Ergiri’nin mülk-i müşterâ-yı sahîh ve sarîhidir keyfe mâ yeşâ’ ve hasbe mâ yürîd mutasarrıf olsun dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî aşer min Cumâdelâhire li sene erba‘a ve hamsîn ve elf. Şuhûdü’l-hâl: Panayot v. Manol, Yorgo v. Trandafilo?, Yani v. Kosta, İstoyo v. Yorgi, Kosta v. Keyoflo, Androtçe v. Yani, Androsa v. Keyoflo, Yorgo v. Trandafilo, Panayot v. Yani, Dimitri v. İstemad, Kanilo v. Yorgi, Panayot v. Yani, Kanilo v. Kosta, Nikola v. Keyoflo, Todori v. Keyoflo, Yani v. Yorgi