Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 240 Hüküm no: 270 Orijinal metin no: [50a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eminzâde Mustafa Efendi b. İbrahim Efendi’nin Hüseyin Ağa b. Abdülmuîn’e mülk çiftliğini sattığı ve tasarrufunda olan on sekiz tarla, dört çayır ve bir bostanını devrettiği Cenâb-ı rükn-i âlîşân ve sadr-ı âsaf-nişân düstûr-ı ma‘delet-nigâr ve müşîr-i ferîdûn-vakār ber hüsn-i burc-ı ihtişâm ve nâhîd-i evc-i ihtirâm menât-ı makālîd-i umûr, müdebbir-i mühimmât-ı cumhûr, nâzım-ı nizâm-ı âlem, medâr-ı mesâlih-i kâffe-i ümem, ayn-ı dîn ü devlet, âyin-i mülk-i memleket, mümehhid-i kavâ‘id-i şer‘-i mübîn, müeyyid-i de‘âim-i dîn-i metîn, bâsıt-ı bisât-ı emn ü emân, hâmî-i hamâ-yı zemîn ü zamân, hâfız-ı bilâd-ı şark u garb, mümehhid-i mihâd-ı süllem-i harb, kāmûs-ı bihâr-ı ma‘delet-i zâhire, nâmûs-ı esrâr-ı saltanat-ı kāhire a‘nî düstûr-ı ekrem vezîr-i a‘zam el-mahfûf bi-sunûfi eltâfi’l-meliki’l-mennân Hazret-i Mehmed Paşa -lâ zâlet âyâtü celâlihî fî sahâifi’l-eyyâm ve’ş-şühûr mastûreten ve râyâtü ikbâlihî fî sahafâti’l-a‘vâm ve’d-duhûr menşûreten- hazretlerinin kapıcıbaşılarından olup Eminzâde demekle şehîr iftihârü’l-emâcid ve’l-ekârim, câmi‘ü’l-mehâmid ve’l-mekârim, Mustafa Ağa b. el-merhûm İbrahim Efendi meclis-i şer‘-i hatîr-i lâzımü’t-tevkīrde işbu kitâb-ı sedâd-intisâbın hâfızı kıdvet-i ashâbü’ş-şerefi’ş-şâmih, umdet-i erbâbü’l-mecdi’r-râsih, sâhibü’d-devleti ve’l-ihtişâm, sâhib-i ezyâlü’l-izzeti ve’l-ihtirâm el-muhtas bi-inâyetillâhi’l-meliki’l-mu‘în, tâcü’d-devleti ve’d-dîn Hüseyin Ağa b. Abdülmu‘în -zîde kadruhû- mahzarında bi’t-tav‘ ve’r-rızâ ikrâr-ı tâm ve takrîr-i kelâm edip akd-i âtî sudûruna değin silk-i mülk-i sahîhimde münselik ve muntazam olan emlâkimden Havâss-ı Refî‘a kazâsı müzâfâtından Büyükçekmece nâhiyesine tâbi‘ Ekşinoz nâm karyede vâki‘ bir tarafdan zahrü’l-eşbâh Mehmed Ağa b. İbrahim Ağa mülküne ve üç tarafdan tarîk-i âma müntehî dâhiliyye ve hâriciyye muhavvatateyni müştemil olup muhavvata-i hâriciyyesi bir bâb tahtânî büyük odayı ve bir ahırı ve ona muttasıl bir bâb tahtânî odayı ve zât-ı eşcâr-ı müsmire ve gayr-ı müsmire hadîkayı ve muhavvata-i dâhiliyyesi iki bâb fevkānî odayı ve altında ahırı ve iki bâb tahtânî odayı ve kileri ve matbahı ve iki fırını ve iki su kuyusunu ve eşcâr-ı müsmire ve gayr-ı müsmireyi hâvî bahçeyi ve taş duvar havluyu müştemil çiftlik ta‘bîr olunur mülk menzilimi cümle tevâbi‘ ve levâhıkı ve âmme-i menâfi‘ ve merâfıkı ile müşârün-ileyh Hüseyin Ağa’ya yüz bin fıddî cedîd ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm ve ol dahi vech-i mübeyyen üzre [50b ] iştirâ ve tesellüm eyledikden sonra semeni olan meblağ-ı mârrü’n-na‘t yüz bin akçeyi mûmâ-ileyh Hüseyin Ağa yedinden bi’t-tamâm ve’l-kemâl ahz u kabz eylediğimden sonra yine karye-i mezbûre sınırı dâhilinde vâki‘ inde ahâliyi’d-diyâr her biri ma‘lûmü’l-hudûd ve’l-mikdâr çiftlik-i mezbûr ile tasarruf olunagelen tahmînen yirmi beş keyl tohum isti‘âb eder on sekiz kıt‘a tarlanın ve yirmi üç arabalık dört kıt‘a çayırı ve bir kıt‘a bostan yerinin hakk-ı tasarrufunu sâhib-i arz ma‘rifetiyle müşârün-ileyh Hüseyin Ağa’ya yirmi beş bin nakd-i mezbûrü’n-na‘t akçeye tefvîz ve ol dahi vech-i mübeyyen üzre tefevvuz ve kabûl ettikden sonra mukābele-i bey‘ ve tefvîzde olan cem‘an yüz kırk beş bin akçeyi müşârün-ileyh Hüseyin Ağa yedinden bi’t-tamâm ve’l-kemâl ahz u kabz eyledim ba‘de’l-yevm menzil-i mahdûd-ı mezkûr mûmâ-ileyh Hüseyin Ağa’nın mülk-i müşterâ-yı sarîhi ve mârrü’z-zikr on sekiz kıt‘a tarla ve dört kıt‘a çayır ve bir kıt‘a bostan yerini müşârün-ileyh Hüseyin Ağa’nın mülk-i müfavvazıdır sâir emsâli tasarrufu gibi mutasarrıf olsun dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini el-mukarru lehü’l-mezbûr Hüseyin Ağa bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve imlâ olundu. Hurrire fi’l-yevmi’s-sânî aşer min Cumâdelâhire li sene erba‘a ve hamsîn ve elf min hicreti men temme lehü’l-izzü ve’ş-şeref. Şuhûdü’l-hâl: Zahrü’l-akrân Ahmed Ağa b. Ali el-Cündî, Süleyman Çelebi b. Abdülmennân el-Mütekā‘id, Eyüb Çelebi b. Mustafa, Mustafa Ağa b. ( ) vekîl-i harc, Receb Efendi b. Abdi, muharrirü’l-hurûf Hidâ[yetullah] Efendi ..? ve gayruhüm mine’l-huzzâr