Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 242 Hüküm no: 271 Orijinal metin no: [50b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karçak v. Yanaki’nin Meldos v. Dador’dan kira alacağını talep ettiği, Meldos’un parayı Karçak’ın cerîmesi için harcadığı Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından İslâm Bey mahallesi sâkinlerinden Karçak v. Yanaki nâm Ermeni mahalle-i mezbûreden işbu râfi‘ü’l-kitâb Meldos v. Dador nâm Ermeni[yi] meclis-i şer‘-i hatîr-i lâzımü’t-tevkīre ihzâr ve mahzarında üzerine takrîr-i da‘vâ edip merkūm Meldos müste’cirim olmağın zimmetinde ücretimden ba‘de külli hesâb on guruş hakkım bâkī kalmışdır, suâl olunup alıverilmesi matlûbumdur dedikde gıbbe’s-suâl mezbûr Meldos cevâbında müdde‘î-i mezbûr Karçak’ın ücretinden ba‘de külli hesâb zimmetimde yedi yüz akçesi var idi lâkin bundan akdem müdde‘î-i mezbûr işbu hâzır bi’l-meclis Nikola nâm Ermeni’nin başını yarıp medîne-i mezbûre subaşısı mezbûru ahz murâd eylediğinde ihtifâ edip meblağ-ı mezbûru cerîmesine harc ve sarf edip mezbûru tahlîs eyledim deyicek gıbbe’l-istintâk ve akībe’l-inkâr mezbûr Meldos’dan takrîrine muvâfık beyyine taleb olundukda udûl-i ricâlden Sefer b. Mehmed ve Mehmed b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olundukda fi’l-vâki‘ bundan akdem mezbûr Karçak işbu hâzır bi’l-meclis olan Nikola nâm Ermeni’nin başını yarıp subaşı ahz murâd eylediğinde ihtifâ edip kendiyi tahlîs için meblağ-ı mezbûru harc ve sarf eyle deyû bizim huzûrumuzda mezbûr Meldos’a emr edip ol dahi emr ile meblağ-ı mezbûru cerîmesiyçün bizim huzûrumuzda harc ve sarf eyledi biz bu husûsa şâhidleriz şehâdet dahi ederiz dediklerinde ba‘de ri‘âyet-i şerâiti’l-kabûl şehâdetleri hayyiz-i kabûlde vâkı‘a olmağın mûcebiyle mezbûr Karçak’ı mu‘ârazadan men‘ birle mâ hüve’l-vâki‘ bi’t-taleb ketb ve terkīm olundu.