Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 242 Hüküm no: 272 Orijinal metin no: [50b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hırsafine bt. Andriye’nin oğlu Dimitri v. Nikola’nın boşandığı kocası Dado v. Lâf’a olan borcuna kefîl olduğu ve Dado ile zevciyyete dâir davasından vazgeçtiği Kazâ-i Havâss-ı Aliyye müzâfâtından Çatalca nâhiyesine tâbi‘ Oklağalı nâm karye sâkinlerinden Hırsafine bt. Andriye nâm Nasrâniyye meclis-i şer‘-i hatîr-i lâzımü’t-tevkīrde zevc-i mutallıkı işbu hâmilü’l-kitâb Dado v. Lâf nâm zimmî muvâcehesinde ikrâr ve takrîr-i kelâm edip sadrî oğlum olup gāib ani’l-meclis olan Dimitri v. Nikola nâm zimmî bundan akdem merkūm Dado yedinden bin fıddî cedîd ceyyid râyic fi’l-vakt akçe istikrâz etmişdi el-hâletü hâzihî oğlum mezbûr Dimitri’nin zimmetinde olan meblağ-ı mersûm bin akçeye emr ve kabûlü hâvî kefâlet ile kefîl olduğumdan sonra mesfûr Dado mukaddemâ zevcim olmağla merkūm ile zevciyyete müte‘allik da‘vâ ve nizâ‘ım var idi hâlen ettiğim da‘vâdan fâriğa olup mezbûr Dado’nun zimmetini zevciyyete müte‘allik da‘vâ ve talebden ibrâ-i âm ile ibrâ ve iskāt-ı tâm ile iskāt eyledim dedikde mukırra-i mezbûre[ni]n vech-i mübeyyen üzre cârî olan ikrâr ve takrîrini el-mukarru lehü’l-mezbûr Dado bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt ve imlâ olundu. Tahrîren fi’l-yevmi’s-sânî aşer min Cumâdelâhire li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed el-Muhtesib, Ali Beşe b. Mustafa, Baba Süleyman b. Turgud, Musa b. Mehmed min huddâm, Dimo v. Kasım, Hristo v. Dado, Tafe v. Kini, Kosta v. Estako, Kife v. Vasil ve gayruhüm