Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 243 Hüküm no: 273 Orijinal metin no: [51a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Handan Bey b. Abdullah’ın evinin yarı hissesini kızı Sâliha’ya sattığı Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Cezerî Kasımpaşa mahallesinde sâkin fahrü’l-akrân Handan Bey b. Abdullah meclis-i şer‘-i hatîr-i lâzımü’t-tevkīrde mezbûr Handan Bey’in sulbiye kebîre kızı işbu râfi‘atü’l-kitâb fahrü’l-muhadderât Sâliha Hâtun mahzarında bi’t-tav‘i’s-sâf ikrâr ve takrîr-i kelâm edip akd-i âtî sudûruna değin silk-i mülk-i sahîhimde münselik olan emlâkimden mahalle-i mezbûrede vâki‘ bir tarafdan Osman Ağa mülkü ve iki tarafdan Eyüb Çelebi mülkü ve bir tarafdan tarîk-i âm ile mahdûd bir bâb fevkānî ve bir bâb tahtânî beyti ve bir sofayı ve zât-ı eşcâr-ı müsmire ve gayr-ı müsmireyi muhtevî hadîkayı müştemil mülk menzilimin nısf-ı şâyi‘ini cemî‘ tevâbi‘ ve levâhıkı ve kâffe-i menâfi‘ ve merâfıkı ile kızım merkūme Sâliha’ya yirmi iki [bin] beş yüz cedîd ceyyid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ettikden sonra semen-i mezbûrü’n-na‘t yirmi iki bin beş yüz akçeyi yedinden bi’t-tamâm ve’l-kemâl ahz u kabz eyledim ba‘de’l-yevm mârrü’z-zikr menzilin nısf-ı şâyi‘i merkūme Sâliha’nın mülk-i müşterâ-yı sahîh ve sarîhidir keyfe mâ teşâ’ve tahtâr mutasarrıfe olsun dedikde mukırr-ı mezbûr Handan Bey’in ber vech-i muharrer cârî ve sâdır olan ikrâr ve takrîrini el-mukarru lehü’l-merkūme Sâliha Hâtun bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve terkīm olundu. Tahrîren fi’l-yevmi’s-sânî aşer min Cumâdelâhire li sene erba‘a ve hamsîn ve elf. Şuhûdü’l-hâl: Umdetü’l-a‘yân Mustafa Ağa el-Müteferrika, Alemüddin Efendi b. Süleyman el-İmâm, Şaban Halîfe el-Müezzin, Mustafa Halîfe el-Müezzin, İlyas Çelebi b. Yakub, Mustafa b. Rıdvan, Hüseyin Bey b. Mehmed el-Cündî, Mehmed b. Yakub, Ali Çelebi b. Handan, Abdurrahman Çelebi el-Hammâmî ve gayruhüm mine’l-huzzâr