Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 244 Hüküm no: 274 Orijinal metin no: [51a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Abdullah’ın evini merhûm Mustafa Çavuş Vakfı’na bey‘ bi’l-istiğlâl yoluyla sattığı Ebâ Eyyûb el-Ensârî -radiye anhu Rabbühü’l-Bârî- mahallâtından Davud Ağa mahallesinde sâkin Hasan b. Abdullah nâm kimesne -tağyîr ve tahrîfden korunmuş olan- meclis-i şer‘-i şerîf ve mahfil-i dîn-i münîfde ikrâr ve i‘tirâf edip bu akdin sudûruna değin kendisine âid mülkü olup yedinde ve taht-ı tasarrufunda bulunan mahalle-i mezbûrede vâki‘ bir tarafdan İbrahim Ağa mülkü ve bir tarafdan Kâmile Hâtun mülkü ve bir tarafdan mekābir-i müslimîn ve bir tarafdan tarîk-i âm ile mahdûd olan cemî‘ menzilini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık kadri ve nisâbı yüz elli kıt‘a riyâlî guruş i‘tibâr olunur harbî sikke ile meskûk kıt‘a-i fıddî semen-i mu‘ayyen-i makbûza hâfız-ı hâze’l-kitâb merhûm Mustafa Çavuş vakfı’na mütevellî olan Mehmed Çelebi b. Hasan’a bey‘ etmeğin ol dahi vakf-ı mezbûr malı ile ondan istiğlâlen bey‘ eyleyip bey‘ ve iştirâ-i sahîhayn-i şer‘iyyeyn eyledikden sonra menzil-i mezbûru ba‘de’t-tahliyye ve’t-tekābuz işbu kitâbın zeylindeki târih senesi Muharremü’l-harâmı’nın gurresinden sene-i kâmile tamâmına değin bu müddet için mikdârı bin sekiz yüz akçe mezbûrü’n-na‘t ücret-i mu‘ayyeneye mütevelli’l-mezbûrdan istîcâr eyledikde ol dahi ona îcâr etmeğin îcâr ve istîcâr-ı sahîhayn-i şer‘iyyeyn ikrâr-ı sahîh-i şer‘î ve i‘tirâf-ı sarîh-i mer‘î oldukda mütevelli’l-merkūm kıbelinden dahi vicâhen ve şifâhen tasdîk olunup [kayd olundu]. Cerâ zâlike ve hurrire fi’l-yevmi’s-sâlis aşer min Cumâdelâhire li sene erba‘a ve hamsîn ve elf. Şuhûdü’l-hâl: Mefharü’l-müderrisîni’l-kirâm Ahmed Efendi el-Bağdâdî, Hasan Çelebi b. Ahmed el-Müderris, Murtaza Efendi b. Mehmed el-İmâm, Hasan Efendi b. Abdi el-İmâm, Davud Halîfe el-Müezzin, Mustafa Çelebi b. Ömer el-Müezzin, Bayram Halîfe b. Ebûbekir el-Müezzin, İbrahim Çelebi b. Mustafa el-İmâm, Şeyhî Çelebi b. Hüseyin, Ahmed Çelebi b. Mehmed, İbrahim Dede b. Abdullah, Receb Efendi b. ( ) el-İmâm, Mehmed Çelebi b. İbrahim, Mustafa Çelebi b. Mehmed ve gayruhüm