Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 245 Hüküm no: 275 Orijinal metin no: [51a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Küttâb zümresinden Osman Çelebi’nin evinde toplanarak içki içip fısk ve fücûr eden kişilerin subaşı ve çorbacı tarafından basıldıkları Medîne-i Ebâ Eyyûb-i Ensârî -radiye anhu Rabbühü’l-Bârî-’de hâlen çorbacı İbrahim Ağa ile subaşı Ali Bey târih-i kitâb gecesi ba‘de’l-ışâ’ meclis-i şer‘a gelip takrîr-i kelâm eylediler ki: Medîne-i mezbûre mahallâtından Takyecibaşı mahallesinde hıdemât-ı saltanat-ı aliyyeden mukābele hizmetinde olan küttâb zümresinden Osman Çelebi nâm kimesne menziline kendine muvâfık kimesneler ile birkaç fâhişeler getirip âlet-i bezm kurup şürb-i humûr ve fısk [u] fücûr eyledikleri mesmû‘umuz olmuşdur kıbel-i şer‘den üzerine varılıp keşf ve mu‘âyene olunmak matlûbumuzdur dediklerinde savb-ı şer‘den bu fakīr ve zeyl-i kitâbda mastûrü’l-esâmî olan müslimîn ile menzil-i mezbûra varıp müşâhede ve mu‘âyene olundukda fi’l-vâki‘ merkūm Osman Çelebi ve atlı mukābelesinde baş Halîfe Mehmed Efendi ve muhâsebe hizmetinde tanbûrî İbrahim Halîfe âlet-i bezm kurup şürb-i hamr ve arak [edip] meyyit-i lâ-ya‘kıl olduklarından mâ‘adâ bir oda içinde elinde şarâb fincanı başında kadife serpûşlu bir nigâr bulunup ahz murâd olundukda huddâmları âlet-i harbden kılıç ve hançer ve bıçak ile yasakçılar üzerine gelip nigâr-ı mezbûreyi cebren ve kahren ellerinden aldıkları mahallinde tahrîr olunmağla mâ vaka‘a bi’t-taleb ketb ol[undu]. Hurrire fi’l-yevmi’s-sâbi‘ min Cumâdelâhire li sene erba‘a ve hamsîn ve elf. Şuhûdü’l-hâl: İshak Efendi b. Veli el-İmâm, Ahmed Çelebi b. Hasan el-Müezzin, Halil Çelebi b. Mustafa el-Müderris, Ali Beşe b. Abdullah er-Râcil, Ahmed Beşe b. Ali, Mustafa Çelebi b. Hamza, Ahmed Çelebi b. ( ) el-Hallâk ve gayruhüm mine’l-huzzâr