Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 246 Hüküm no: 277 Orijinal metin no: [51b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Minho v. Mano’nun üç tarlasını Yani v. Minho’ya devrettiği Vilâyet-i Rumeli’nde Yanya kazâsına tâbi‘ Kasteraki nâm karye sâkinlerinden Minho v. Mano nâm zimmî meclis-i şer‘-i hatîr-i lâzımü’t-tevkīrde işbu hâmilü’l-kitâb Yani v. Minho Eşköyel muvâcehesinde bi’t-tav‘ ve’r-rızâ ikrâr ve takrîr-i kelâm edip tefvîz-i âtî sudûruna değin taht-ı tasarrufumda olan arâziden karye-i mezbûre sınırı dâhilinde Handaki nâm mevzi‘de vâki‘ bir tarafdan Yani v. Papa Mihal tarlasına ve bir tarafdan Çeto v. ( ) tarlasına ve bir tarafdan Pano v. Dimolako tarlasına ve bir tarafdan Kiryaki v. İstamo tarlasına müntehî tahmînen dört keyl tohum isti‘âb eder bir kıt‘a tarla ve yine etrâfı değirmen harkı ve tarîk-i âm ile mahdûd bir kıt‘a tarla ve yine bir tarafdan Minho v. Kini tarlasına ve bir tarafdan İstamo v. Vasil tarlasına ve bir tarafdan İlya v. Yano tarlasına ve bir tarafdan hendek ile mahdûd tahmînen dört keyl tohum isti‘âb eder bir kıt‘a tarla cem‘an üç kıt‘a tarlanın hakk-ı tasarrufunu sâhib-i arz ma‘rifetiyle merkūm Yani’ye üç bin yüz elli fıddî cedîd ceyyid râyic fi’l-vakt akçeye tefvîz ve ol dahi minvâl-i muharrer üzre tefevvuz ve kabûl ettikden sonra mukābele-i tefvîzde olan meblağ-ı mârrü’l-vasf üç bin yüz elli akçeyi mesfûr Yani yedinden bi’t-tamâm ve’l-kemâl ahz u kabz eyledim ba‘de’l-yevm zikr olunan üç kıt‘a tarla mersûmundur sâir emsâli tasarrufu gibi mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Yani tasdîk edicek mâ hüve’l-vâki‘ gıbbe’l-ibtigā sebt ve imlâ olundu. Hurrire fi’l-yevmi’r-râbi‘ aşer min Cumâdelâhire li sene erba‘în ve hamsîn [ve elf]. Şuhûdü’l-hâl: Mustafa Beşe el-Muhtesib, Ali Beşe b. Mustafa, Hüseyin Çelebi b. Ali Beşe, Bayram Sofu min huddâm, Tanaş v. Oğlan, Dimo v. Pano, İstamo v. Papa Yani, Mano v. Papa İstati, Yorgo v. Todoş, Mişo v. Lefoyder, Nikola v. Padoş ve gayruhüm mine’l-hâzırîn