Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 247 Hüküm no: 278 Orijinal metin no: [52a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Dimo’nun tasarrufundaki tarlanın yarı hissesini Tanaş v. Kini’ye devrettiği Gurre-i Cumâdelâhire li sene erba‘a ve hamsîn ve elf Vilâyet-i Rumeli’nde Tepedelen kazâsına tâbi‘ Arz demekle ma‘rûf karye sâkinlerinden Yani v. Dimo nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Tanaş v. Kini nâm zimmî muvâcehesinde bi’t-tav‘i’s-sâf ikrâr-ı tâm ve takrîr-i kelâm edip tefvîz-i âtî sudûruna değin mutasarrıf olduğum arâziden karye-i mezbûre sınırı dâhilinde Kostanik nâm mevzi‘de vâki‘ bir tarafdan Dimo v. Yani tarlasına ve bir tarafdan Kigiprenesti tarlasına ve bir tarafdan Kiga v. Pero tarlasına ve bir tarafdan Dimo v. Nakoceb? tarlasına müntehî diyârımız keyli ile tahmînen bir keyl tohum isti‘âb eder bir kıt‘a tarlanın nısf hisse-i şer‘iyye-i şâyi‘asının hakk-ı tasarrufunu sâhib-i arz ma‘rifetiyle mezbûr Tanaş’a iki yüz cedîd ceyyid râyic fi’l-vakt akçeye tefvîz ve ol dahi vech-i mübeyyen üzre tefevvuz ve kabûl ettikden sonra mukābele-i tefvîzde olan iki yüz nakd-i mezbûrü’n-na‘t akçeyi mezkûr Tanaş yedinden bi’t-tamâm ve’l-kemâl ahz u kabz eyledim ba‘de’l-yevm zikr olunan tarladan nısf hisse-i şer‘iyye-i şâyi‘ası merkūm Tanaş’ındır sâir emsâli tasarrufu gibi mutasarrıf olsun dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini el-mukarru lehü’l-mezbûr Tanaş bi’l-muvâcehe tasdîk edicek mâ hüve’l-vâki‘ gıbbe’l-ibtigā sebt ve imlâ olundu. Hurrire fî gurreti Cumâdelâhire li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed el-Muhtesib, Ali Beşe b. Mustafa, Hüseyin Çelebi b. İbrahim, Mustafa b. Abdullah, Niko v. Demko? ve gayruhüm mine’l-huzzâr