Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 248 Hüküm no: 279 Orijinal metin no: [52a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Kethüdâ b. Ebûbekir’in menzilini Mehmed Beşe b. Zünnûn’a sattığı Bundan esbak vilâyet-i Rumeli’nde Anbar nâm kasaba sâkinlerinden olup hâlen mahrûse-i Şam Trablus’unda ebrâc kethüdâsı olan zahrü’l-eşbâh Mustafa Kethüdâ b. Ebûbekir nâm râcil meclis-i şer‘-i hatîr-i lâzımü’t-tevkīrde işbu hâmilü’l-kitâb Mehmed Beşe b. Zünnûn nâm râcil mahzarında bi’t-tav‘ ve’r-rızâ ikrâr ve takrîr-i kelâm edip akd-i âtî sudûruna değin silk-i mülkümde münselik olan emlâkimden kasa[b]a-i mezbûre Anbar’da Aya Nikola mahallesinde vâki‘ bir tarafdan Kebaşoğlu Papa mülküne ve bir tarafdan müşterî-i mezbûr Mehmed Beşe mülküne ve iki tarafdan tarîk-i âma müntehî bir bâb tahtânî beyti ve bi’r-i mâyı ve zât-ı eşcâr-ı müsmire ve gayr-ı müsmire muhavvatayı müştemil mülk menzilimi cümle tevâbi‘ ve levâhıkı ve âmme-i menâfi‘ ve merâfıkı ile mesfûr Mehmed Beşe’ye kırk kıt‘a esedî guruşa bey‘-i bâtt-ı sahîh-i şer‘î ile bey‘ ve kabz-ı semen edip mebî‘-i mezkûru mahallinde kabza müşterî-i merkūmu taslît eyledim, ba‘de’l-yevm menzil-i mahdûd-ı mezkûr merkūm Mehmed Beşe’nin mülk-i müşterâ-yı sarîhidir keyfe mâ yeşâ’ ve hasbe mâ yürîd mutasarrıf olsun dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini el-mukarru lehü’l-mezbûr Mehmed Beşe bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt olundu. Hurrire fi’l-yevmi’s-sânî min Cumâdelâhire li sene erba‘a ve hamsîn ve elf. Şuhûdü’l-hâl: Hasan Çelebi b. Mehmed er-Râcil, Yusuf Beşe b. Hüseyin er-Râcil, Hüseyin Beşe b. Hüseyin Kuloğlu, Zahrü’l-müderrisîni’l-kirâm Halil Efendi, Mehmed Beşe b. Alagözî er-Râcil, Yusuf Beşe b. Mahmud nalband, İbrahim Çelebi b. Mustafa, Baba Süleyman b. Turgud ve gayruhüm