Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 248 Hüküm no: 280 Orijinal metin no: [52a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma ve Râbia hâtunların oturduğu Fâtıma Hâtun Evkâfı’na ait ev harap durumda olup keşfi ve kendi mallarıyla yeniden yapmalarına izin verildiği Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Kiremitçi Süleyman mahallesi sâkinelerinden işbu râfi‘ayi’l-kitâb Fâtıma ve Râbia hâtunlar taraflarından husûs-ı âti’l-beyâna vekîl olup hasm-ı câhid-i şer‘î mahzarında bimâ hüve tarîk-i nehcü’ş-şer‘î şer‘an vekâleti sâbite olan fahrü’l-hutebâ’i’l-kirâm Abdurrahman Efendi b. Abdi meclis-i şer‘-i hatîr-i lâzımü’t-tevkīrde bi’l-vekâle takrîr-i kelâm edip müvekkiletân-ı mezbûretânın mahalle-i mezbûrede vâki‘ bir tarafdan Nakībzâde Gürcü Mehmed Paşa’nın hâtunu mülküne ve bir tarafdan Baba Geylânî zâviyesine ve bir tarafdan mahalle-i [mezbûre] mescidi imâmına meşrûta olan menzil ile ba‘zan Ali Bey vakfı’na ve bir tarafdan tarîk-i âma müntehî iki bâb tahtânî ve bir bâb fevkānî beyti ve önünde sundurmayı ve zât-ı eşcâr-ı müsmire ve zât-ı gayr-ı müsmireyi muhtevî bahçeyi ve bi’r-i mâyı ve kenîfi müştemil merhûme Fâtıma Hâtun evkāfı’ndan olup ber vech-i meşrûtiyyet mutasarrıf oldukları menzil mürûr-ı eyyâm ve kürûr-ı a‘vâm ile harâba müşrif olup kābil-i süknâ olmamağın kıbel-i şer‘den üzerine varılıp keşf ve mu‘âyene ve nukzu tahmîn-i sahîh ile tahmîn ve takvîm olunup müceddeden kendi malları ile nefisleri için binâya izin verilmek taleb ederim dedikde cânib-i şer‘den mevlânâ İbrahim Efendi irsâl olunup ol dahi hâssa mi‘mârlarından Üstâd Mustafa b. Abdullah ve zeyl-i kitâbda mastûrü’l-esâmî olan müslimîn ile menzil-i mezbûrun üzerine varıp [52b ] nazar ettiklerinde fi’l-hakīka zikr olunan iki bâb tahtânî ve bir bâb fevkānî beyt harâba müşrif olup kābil-i süknâ olmadığını müşâhede ve mesâha eylediklerinde menzil-i mezbûrun bi-zirâ‘i’l-bennâ tûlen on üç ve arzan on bir bi-hesâb-ı şatrancî yüz kırk üç zirâ‘ sakfının beher zirâ‘ı yirmi beşer akçeden üç bin beş yüz yetmiş beş akçe ve yine tûlen on ve arzan üç ve def‘a tûlen yedi ve arzan dört bi-hesâb-ı şatrancî elli sekiz zirâ‘ tahta döşemesinin beher zirâ‘ı on beşer akçeden sekiz yüz yetmiş akçe ve yine tûlen sekiz kadden dört buçuk bi-hesâb-ı mezbûr otuz altı zirâ‘ taş duvarının beher zirâ‘ı yirmi beşer akçeden dokuz yüz akçe cem‘an menzil-i mezbûrun nukzunu beş bin üç yüz kırk beş akçeye takvîm ve tahmîn eylediklerini mevlânâ-yı mezbûr mahallinde ketb ve terkīm ve ba‘dehû gelip vukū‘u üzre ihbâr ve inhâ eylemeğin müceddeden binâya izin verilip işbu hurûf bi’t-taleb ketb ü tahrîr olundu. Tahrîren fi’l-yevmi’l-hâmis ve’l-ışrîn min Cumâdelûlâ li sene erba‘a ve hamsîn ve elf min hicreti’n-nebeviyye -aleyhi efdalü’t-tahiyye. Şuhûdü’l-hâl: Fahrü’l-cüyûş Ali Çelebi b. Halil solak, Fahrü’l-eimme Mustafa Efendi [b.] Ali, Mehmed Efendi b. Yusuf, Mehmed Beşe [b.] Abdi er-Râcil, Abdullah Çelebi b. İbrahim el-Müezzin, Mustafa Beşe b. Abdullah er-Râcil, Ali b. Turhan, el-Hâc Musa b. Halil, Ömer b. Şaban el-Müezzin, Ahmed b. Veli ve gayruhüm mine’l-huzzâr