Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 249 Hüküm no: 281 Orijinal metin no: [52b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Abdullah’ın menzilini Yorgi v. Dimo’ya sattığı Havâss-ı Aliyye -humiyet ani’l-âfât ve’l-beliyye- tevâbi‘inden Karka nâm karyede sâkin Mustafa Beşe b. Abdullah nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Yorgi v. Dimo nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i mezbûrede vâki‘ iki tarafdan müşterî-i mezbûr Yorgi mülkü ve bir tarafdan tarîk-i âm ile mahdûd bir bâb fevkānî ve iki bâb tahtânî beyti ve bir sofayı ve zât-ı eşcâr-ı müsmire ve gayr-ı müsmireyi muhtevî bahçeyi müştemil mülk menzilimi cemî‘ tevâbi‘ ve levâhıkı ve kâffe-i menâfi‘ ve merâfıkı ile mezbûr Yorgi’ye on bin beş yüz fıddî cedîd ceyyid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ettikden sonra semen-i mezbûrü’n-na‘t on bin beş yüz akçeyi bi’t-tamâm ve’l-kemâl ahz u kabz eyledim ba‘de’l-yevm mârrü’z-zikr menzil mezbûr Yorgi’nin mülk-i müşterâ-yı sahîh ve sarîhidir keyfe mâ yeşâ’ ve hasbe mâ yürîd mutasarrıf olsun dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr Yorgi bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ alâ vukū‘ihî bi’t-taleb ketb ve imlâ olundu. Tahrîren fi’l-yevmi’l-hâmis ve’l-ışrîn min Cumâdelûlâ li sene erba‘a ve hamsîn ve elf. Şuhûdü’l-hâl: Sinan b. Haydar er-Râcil, Mustafa Bey el-Kasab, Mustafa Beşe el-Muhtesib, Hüseyin Çelebi mine’l-huddâm, Mustafa b. Veli min huddâm ve gayruhüm mine’l-huzzâr