Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 250 Hüküm no: 282 Orijinal metin no: [52b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avyori v. Rizo’nun mülk bostan yerini Nikola v. Yani’ye sattığı Vilâyet-i Rumeli’nde Gerbeniş kazâsına tâbi‘ İstenime nâm karye sâkinlerinden Avyori v. Rizo nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb Nikola v. Yani nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i mezbûre sınırı dâhilinde vâki‘ bir tarafdan İstadi v. ( ) çayırı ve bir tarafdan Avyori v. Yorgi çayırı ve bir tarafdan Mihal v. Bon bostanı ve bir tarafdan vâdi ile mahdûd eşcâr-ı müsmire ve gayr-ı müsmireyi hâvî âdeten saky olunduğu üzre tahmînen bir buçuk dönüm mülk bostan yerimin cemî‘ tevâbi‘ ve levâhıkı ve kâffe-i menâfi‘ ve merâfıkı ile mezbûr Nikola’ya bin sekiz yüz fıddî-i Osmânî cedîd ceyyid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ ettikden sonra semen-i mezbûrü’n-na‘t bin sekiz yüz akçeyi yedinden bi’t-tamâm ve’l-kemâl ahz u kabz edip zikr olunan bostan yerini mahallinde kabza mezbûr Nikola’yı taslît eyledim ba‘de’l-yevm mârrü’z-zikr bostan yeri mezbûr Nikola’nın mülk-i müşterâ-yı sahîh ve sarîhidir keyfe mâ yeşâ’ ve yürîd mutasarrıf olsun dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve imlâ olundu. Hurrire fi’l-yevmi’s-sânî min Cumâdelâhire li sene erba‘a ve hamsîn ve elf. Şuhûdü’l-hâl: Avyori [v.] Şeropli, Yorgi v. Nikola, Yani v. Derme?, Panayot v. Nikola, Mihal v. Konino ve gayruhüm mine’l-huzzâr