Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 251 Hüküm no: 283 Orijinal metin no: [52b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Apostol v. Dimo’nun Tanaş v. Lambo’ya mumhâne ile oda ve bakkal dükkânındaki hissesini devrettiği ve mumhânedeki mum yağını sattığı Mahmiye-i Kostantıniyye -humiyet ani’l-âfât ve’l-beliyye- hısnı ebvâbından Topkapısı hâricinde vâki‘ merhûm Takyeci İbrahim Çavuş mahallesinde sâkin Apostol v. Dimo meclis-i şer‘de işbu hâmilü’l-kitâb Tanaş v. Lambo nâm zimmî muvâcehesinde bi-tav‘ihî ikrâr ve takrîr-i kelâm edip mahalle-i mezbûrede vâki‘ iki tarafdan merhûm İbrahim Çavuş vakfı’na ve bir tarafdan vezîr-i rûşen-zamîr Kenan Paşa hazretleri bahçesine ve bir tarafdan tarîk-i âma müntehî merhûm müşârün-ileyh İbrahim Çavuş vakfı’ndan olup icâre-i mu‘accele ve beher şehr iki yüz akçe ücret-i müeccele ile altı kimesne mutasarrıf olduğumuz şem‘hânede ve ona muttasıl bir bâb oda ve bakkal dükkânında olan altı sehimden bir sehim hisse-i şer‘iyye-i şâyi‘amı cemî‘ âlât ve esbâbı ve mütevellî-i vakf-ı mezbûr ma‘rifetiyle merkūm Tanaş’a on altı bin akçeye tefvîz ve ol dahi vech-i mübeyyen üzre tefevvuz ve kabûl ettikden sonra mukābele-i tefvîzde olan on altı bin akçeyi merkūm Tanaş yedinden tamâmen ahz u kabz eylediğimden sonra zikr olunan şem‘hânede mevcûd olan revgan-ı şem‘in her vakıyyesi on yedişer akçeye olmak hesâbı üzre sekiz yüz doksan beş vakıyye mum yağı on beş bin yüz seksen beş akçeye merkūm Tanaş’a bey‘-i bâtt-ı sahîh-i şer‘î ile bey‘ ve teslîm ve ol dahi minvâl-i muharrer üzre iştirâ ve tesellüm ettikden sonra mukābele-i bey‘ ve tefvîzde olan otuz bir bin yüz seksen beş akçeyi mezkûr Tanaş yedinden bi’t-tamâm ve’l-kemâl ahz u kabz eyledim ba‘de’l-yevm zikr olunan şem‘hâne ve ona muttasıl bir bâb bakkal dükkânı ile bir bâb odanın altı sehimden bir sehmi merkūm Tanaş’ındır sâir emsâli gibi mutasarrıf olsun ve mârrü’l-vasf revgan-ı şem‘ dahi mezbûr Tanaş’ın mülk-i müşterâ-yı sahîh ve sarîhidir keyfe mâ yeşâ’ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Tanaş bi’l-muvâcehe tasdîk edicek mâ hüve’l-vâki‘ gıbbe’l-ibtigā ketb ü tahrîr olundu. Tahrîren fi’l-yevmi’s-sâlis min Cumâdelâhire li sene erba‘a ve hamsîn ve elf. Şuhûdü’l-hâl: Şeyh Mehmed Oturak, Mehmed Çelebi b. Perviz, Mustafa Beşe el-Muhtesib, Ali Beşe mine’l-huddâm, Mustafa Çelebi min huddâm, İbrahim Çelebi mine’l-huddâm, Apostol v. Baba, Estafodi, Franko v. Todori, Panayot v. Minho, Dimo v. İstadi, Paros v. Dimo ve gayruhüm mine’l-huzzâr