Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 261 Hüküm no: 298 Orijinal metin no: [55a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Paşa b. Hızır’ın mülk menzilini zevcesi Havva Hâtun’a sattığı Hâlen ber vech-i arpalık Niğbolu sancağına mutasarrıf olan emîrü’l-ümerâ’i’l-kirâm kebîrü’l-küberâ’i’l-fihâm zü’l-kadri ve’l-ihtişâm sâhibü’l-izzi ve’l-ihtirâm el-manzûr bi-ayni inâyetillâhi’l-meliki’l-allâm Hazret-i Hasan Paşa b. Hızır taraf-ı şerîf ve cânib-i münîflerinden bey‘-i câi’z-zikr ve kabz-ı semeni ikrâra vekîl olup zahrü’ş-şuyûh eş-Şeyh Mehmed Efendi b. el-merhûm eş-Şeyh Ali Efendi ve el-Hâc Hamza b. Ali şehâdetleri ile şer‘an vekâleti sâbite olan fahrü’l-eşbâh Mehmed Çelebi b. Yahya meclis-i şerî‘at-ı şerîfe-i garrâ ve mahkeme-i refî‘a-i kübrâ el-vesî‘u finâühâ el-mümteni‘u fenâühâ sallallâhu te‘âlâ alâ şâri‘ihâda Paşa-yı müşârün-ileyh hazretlerinin halîlesi olup işbu hâfıza-i sahîfe-i sahîha-i şer‘iyye ve râfi‘a-i vesîka-i enîka-i mer‘iyye fahrü’l-muhadderât zahrü’l-muvakkarât safiyyetü’z-zât melekiyyetü’s-sıfât Havvâ Hâtun tarafından bey‘-i âti’z-zikr ve kabz-ı semeni tasdîke vekîl olup mezkûreyi ma‘rifet-i şer‘iyye ile ârifân olan Veli Efendi b. Mehmed ve el-Hâc Hamza b. Ali şehâdetleriyle şer‘an vekâleti sâbite olan zahrü’l-ulemâi’l-müteverri‘în Mehmed Efendi b. Hızır mahzarında bi’l-vekâle ikrâr-ı sahîh-i şer‘î ve i‘tirâf-ı sarîh-i mer‘î kılıp müvekkilim Paşa-yı müşârün-ileyh hazretlerinin zikri âtî akdin sudûruna değin silk-i mülk ve tasarruflarında ve taht-ı yedlerinde münselik ve muntazam olan emlâkinden medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Şah Sultan mahallesinde vâki‘ bir tarafdan merhûm Hüsrevzâde Mustafa Efendi vakfı’na ve bir tarafdan Şah Sultan Câmi‘i haremine ve bir tarafdan Medîne-i Münevvere vakfı’na ve bir tarafdan sâhil-i bahre muttasıl dört bâb fevkānî ve üç bâb tahtânî odaları ve ahırı ve matbahı ve şehnişîni ve iki sofayı ve kenîfi ve muhavvatayı ve zât-ı eşcâr-ı müsmire ve gayr-ı müsmire hadîkayı müştemil mülk menzilini cümle tevâbi‘ ve levâhıkı ve âmme-i menâfi‘ ve merâfıkı ile müvekile-i mûmâ-ileyhâ Havvâ Hâtun’a yüz bin cedîd ceyyid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve onlar dahi vech-i mübeyyen üzre iştirâ ve tesellüm eylediklerinden sonra semeni olan meblağ-ı mârrü’n-na‘t yüz bin akçeyi müvekkile-i mûmâ-ileyhâ Havvâ yedinden bi’t-tamâm ve’l-kemâl ahz u kabz eyledi ba‘de’l-yevm menzil-i mahdûd-ı mezkûr müşârün-ileyhâ Havvâ Hâtun’un mülk-i müşterâ-yı sarîhidir keyfe mâ teşâ’ve hasbe mâ türîd mutasarrıfa olsun dedikde vekîl-i mezbûr Mehmed Çelebi’nin vech-i mübeyyen üzre vekâleten cârî olan ikrâr ve takrîrini vekîl-i müşârün-ileyh Mehmed Efendi bi’l-muvâcehe tasdîk edicek mâ hüve’l-vâki‘ gıbbe’l-ibtigā sebt ve imlâ olundu. Hurrire fi’l-yevmi’s-sâdis min Cumâdelâhire li sene erba‘a ve hamsîn ve elf. Şuhûdü’l-hâl: Umdetü’s-sâlikîn eş-Şeyh Ahmed Efendi el-vâ‘iz bi-Şah Sultan, eş-Şeyh Mehmed Efendi b. Ali el-Muhaddis, Hüseyin Efendi b. Ahmed el-Cündî, Mehmed Çelebi b. İsmail el-Câbi, Mustafa Beşe el-Muhtesib, el-Hâc Ahmed Beşe b. ( ) el-Câbi ve gayruhüm mine’l-huzzâr