Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 265 Hüküm no: 304 Orijinal metin no: [56a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Subaşı b. Ramazan’ın Mustafa Ağa b. Abdurrahman’dan ödünç aldığı ve karşılığında bahçesini rehin olarak verdiği Mahmiye-i Kostantıniyye hısnı ebvâbından Topkapısı hâricinde Emânî Çelebi mahallesinde sâkin umdetü’l-emâcid ve’l-ekârim, câmi‘ü’l-mehârim ve’l-mekârim Mustafa Subaşı b. Ramazan meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda Dergâh-ı âlî -dâme mahfûfen bi’l-me‘âlî- solaklarından işbu sâhibü’l-vesîkati’ş-şer‘iyye fahrü’l-emâsil ve’l-akrân Mustafa Ağa b. Abdurrahman el-Yesârî mahzarında bi’t-tav‘ ve’r-rızâ ikrâr ve takrîr-i kelâm edip merkūm Mustafa Ağa’dan beş yüz kıt‘a tâmmü’l-vezn ve sahîhü’l-ayâr râyic fî cemî‘i’l-bilâd ve’l-emsâr riyâlî guruş istikrâz ve kabz edip meblağ-ı mezbûrü’n-na‘t zimmetimde lâzımü’l-edâ ve vâcibü’l-kazâ deynim olup? …? sonra meblağ-ı mezbûr mukābelesinde silk-i mülk-i sahîhimde münselik olan emlâkimden medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından İslâm Bey mahallesinde vâki‘ bir tarafdan merhûm İslâm Bey vakfı ve bir tarafdan ( ) bostanı ve bir tarafdan Abdülbâkī Ağa mezra‘ası ve bir tarafdan tarîk-i âm ile mahdûd zât-ı eşcâr-ı müsmireyi hâvî olan hadîkamı cemî‘ tevâbi‘ ve levâhıkı ve kâffe-i menâfi‘ ve merâfıkı ile ba‘de’t-tahliyye ve’t-tekābuz mûmâ-ileyh Mustafa Ağa’ya katında rehin vaz‘ ve teslîm edip ol dahi vech-i muharrer üzre irtihân ve kabz ve tesellüm eyledi dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk eylemeğin mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî aşer min Cumâdelâhire li sene erba‘a ve hamsîn ve elf. Şuhûdü’l-hâl: Fahrü’l-kuzât Hidâyetullah Efendi el-Kâtib, Fahrü’l-kuzât İbrahim Efendi el-Kâtib, muharrirü’l-hurûf Himmet Efendi el-Kâtib, Mustafa Beşe b. İbrahim, Ali Beşe b. Abdullah Camcı, Ali Beşe b. Receb er-Râcil, Mehmed Beşe b. Mustafa er-Râcil, Mustafa Beşe b. Mehmed el-Muhtesib, Hüseyin b. Sinan er-Râcil, Baba Süleyman b. Turgud, Musa b. Mehmed ve gayruhüm mine’l-hâzırîn