Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 266 Hüküm no: 305 Orijinal metin no: [56a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aynî bt. Sefer’in Arzuman b. Sevindik ile muhâlaa ile boşandıkları halde Arzuman’ın kocası gibi davrandığı, talebi üzerine daha önce boşandıklarının mahkeme tarafından tespit edildiği Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Serv mahallesi sâkinelerinden Aynî bt. Sefer nâm hâtun meclis-i şer‘-i şerîf-i lâzımü’t-teşrîfde zevc-i mutallıkı işbu râfi‘ü’l-kitâb Arzuman b. Sevindik nâm kimesne mahzarında üzerine takrîr-i da‘vâ edip zevcim mezbûr Arzuman ile hüsn-i zindegânem olmayıp beynimizde şikāk vâki‘ olmağın zimmetinde mütekarrir olan iki bin akçe mehr-i müeccelimdem ve nafaka-i iddetimden fâriğa olmak üzre muhâla‘a-i sahîha-i şer‘iyye ile muhâla‘a edip ehadühümâ âharın zimmetini zevciyyete müte‘allik da‘vâ ve talebden ibrâ ve iskāt etmiş iken hâlen mezbûr Arzuman benimle zevciyyet mu‘âmelesi etmek murâd eder suâl olunup takrîri tahrîr ve bi-hasebi’ş-şer‘ icrâ-yı hak olunması matlûbumdur dedikde gıbbe’s-suâl ve akībe’l-inkâr müdde‘iye-i mezbûre Aynî’den müdde‘âsını mübeyyine beyyine taleb olundukda udûl-i müslimînden Ali Beşe b. Ahmed ve Ahmed b. Sefer nâm kimesneler li ecli’ş-şehâde [56b ] meclis-i şer‘a hâzırân olup istişhâd olundukda fi’l-vâki‘ mezbûre Aynî Hâtun ile zevci mezbûr Arzuman beyninde şikāk vâki‘ olup mesfûre Aynî Hâtun’un mezbûr Arzuman zimmetinde mütekarrir olan iki bin akçe mehr-i müeccelinden ve nafaka-i iddetinden fâriğa olmak üzre ehadühümâ âharın zimmetini zevciyyete müte‘allik da‘vâ ve talebden ibrâ-i âm ile ibrâ ve iskāt-ı tâm ile iskāt eyledi biz bu husûsa şâhidleriz ve şehâdet-i şer‘iyye dahi ederiz deyû edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a olmağın mûcebiyle hüküm birle mâ hüve’l-vâki‘ bi’t-taleb ketb ve imlâ olundu. Tahrîren fi’l-yevmi’r-râbi‘ aşer min Cumâdelâhire li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed el-Muhtesib, Ali Beşe b. Mustafa el-Muhzır, Hüseyin Çelebi b. Ali el-Muhzır, Mustafa b. Veli el-Muhzır, Mustafa b. İbrahim el-Muhzır, el-Hâc Ahmed Beşe b. İsrâfil Çukadâr, Bayram Sofu el-Muhzır, Süleyman b. Turgud ve gayruhüm