Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 267 Hüküm no: 306 Orijinal metin no: [56b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiryaki v. Dimitri’nin Nikola v. Yani’ye sattığı saman bedelinden alacağını borcu ile takas ettiği ve kalan alacağını talep ettiği Hâslar kazâsına tâbi‘ Bergos nâm karye sâkinlerinden râfi‘ü’l-kitâb Kiryaki v. Dimitri nâm zimmî meclis-i şer‘-i şerîfde Nikola v. Yani muvâcehesinde üzerine da‘vâ edip mezbûrun zimmetinde beher arabası ikişer yüz ellişer akçeye olmak üzre dört araba saman bahâsından bin cedîd akçe hakkım olup meblağ-ı mezbûrdan sekiz yüz akçesini mezbûrdan târih-i kitâbdan altı sene mukaddem beher keyli ellişer akçeye olmak üzre on beş keyl buğday bahâsından yedi yüz elli akçe ve dört yüz akçe kıymetli bir re’s kara sığır öküzü ve kırkar akçeye olmak üzre üç keyl burçak bahâsından yüz yirmi akçe ki cem‘an bin iki yüz yetmiş kâsid ve züyûf akçenin altından kıymet-i şer‘iyyesi olan sekiz yüz cedîd akçe deynime takās edip bâkī olan iki yüz akçe hakkımı alıverilmek taleb ederim dedikde gıbbe’s-suâl cevâbında mezbûr Nikola müdde‘î-i mezbûrun cümle müdde‘âsını ikrâr ve tasdîk ve ber vech-i mübeyyen dört araba saman bahâsından bin cedîd akçe deyni olup meblağ-ı mezbûrdan sekiz yüz akçesini müdde‘î-i mezbûrun zimmetin[de?] lâzım gelen sekiz yüz akçeye takās edip ve iki yüz akçe deyni olduğunu i‘tirâ[f] ve tahkīk eylemeğin ber mûceb-i ikrârihî meblağ-ı mezbûr iki yüz akçenin edâsına hükm [birle] mâ vaka‘a bi’t-taleb ketb ve terkīm olundu. Tahrîren fi’l-yevmi’s-sâbi‘ aşer min Cumâdelâh[ire] li sene erba‘a ve hamsîn ve elf. Şuhûdü’l-hâl: Ali Beşe b. Mustafa, İbrahim Çelebi b. Mustafa, Baba Süleyman b. Turgud, Hüseyin Çelebi b. Ali ve gayruhüm