Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 267 Hüküm no: 307 Orijinal metin no: [56b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Ali el-Yesârî’nin evini Cafer Paşa Vakfı’na bey‘ bi’l-istiğlâl yoluyla sattığı Kostantıniyyetü’l-mahmiyye mahallâtından Çırakçı Hasan mahallesinde sâkin Mehmed Çelebi b. Ali el-Yesârî nâm kimesne -tağyîr ve tahrîfden korunmuş olan- meclis-i şer‘-i şerîf ve mahfil-i dîn-i münîfde ikrâr ve i‘tirâf edip bu akdin sudûruna değin kendisine âid mülkü olup yedinde ve taht-ı tasarrufunda bulunan mahalle-i mezbûrede vâki‘ bir tarafdan Âişe Hâtun bt. Abdi mülkü ve bir tarafdan Ali Beşe mülkü ve bir tarafdan Kara v. Çalabverdi mülkü ve bir tarafdan İstefan v. Pagali mülkü ile mahdûd olan cemî‘ menzilini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık kadri ve nisâbı yüz seksen kıt‘a riyâlî guruş i‘tibâr olunur harbî sikke ile meskûk kıt‘a-i fıddî semen-i mu‘ayyen-i makbûza hâfız-ı hâze’l-kitâb medîne-i Ebâ Eyyûb el-Ensârî’de vâki‘ Cafer Paşa vakfı’na mütevellî olan İsmail Çelebi b. Resul nâm kimesneye bey‘ edip ol dahi vakf-ı mezbûr malı ile ondan istiğlâlen iştirâ eylemeğin tarafeynden îcâb ve kabûlü ile cânibeynden bedeleynde teslîm ve tesellümü müştemil bey‘ ve iştirâ-i sahîhayn-i şer‘iyyeyn eyledikden sonra menzil-i mezbûru ba‘de’t-tahliyye zeylindeki târih-i şehr gurresinden sene-i kâmile tamâmına değin bu müddet için mikdârı yirmi yedi mezbûrü’n-na‘t kıt‘a ücret-i mu‘ayyeneye mütevelli’l-mezbûrdan istîcâr eyledikde ol dahi ona îcâr etmeğin îcâr ve istîcâr-ı sarîhayn-i mer‘iyyeyn ve ikrâr-ı sahîhayn-i şer‘iyyeyn men lehü’t-tasdîk kıbelinden dahi vicâhen ve şifâhen tasdîk olundukdan sonra [semen-i] mezbûrun ve ücret-i mesfûrenin cümlesine ve derk-i menzile mukırr-ı mezbûrun karındaşı olan Sâlih Çelebi nâm kimesne emr ve kabûlü hâviye kefâlet-i sahîha-i şer‘iyye ile kefîl olmağın [kayd olundu]. Cerâ zâlike ve hurrire fi’l-yevmi’s-sâmin aşer min Cumâdelâhire li sene erba‘a ve hamsîn ve elf. Şuhûdü’l-hâl: Resul b. Hızır, Abdullah Çelebi b. Ahmed, Halil b. Mehmed, Veli b. İsâ el-Câbi, Mehmed b. Mehmed, Mustafa Beşe b. Mehmed, Baba Süleyman b. Turgud