Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 268 Hüküm no: 308 Orijinal metin no: [57a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âmine Hâtun bt. Kurd Çavuş’un mülk menzilini Yusuf b. Abdullah’a sattığı Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Evlice Baba mahallesinde sâkine Âmine Hâtun bt. Kurd Çavuş meclis-i şer‘-i hatîr-i lâzımü’t-tevkīrde işbu râfi‘ü’l-kitâb Yusuf b. Abdullah nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip akd-i âtî sudûruna değin silk-i mülk-i sahîh ve sarîhimde münselik olan emlâkimden mahalle-i mezbûrede vâki‘ bir tarafdan Peremeci Ali b. ( ) mülküne ve bir tarafdan Meryem Hâtun bt. Abdullah mülkü ve bir tarafdan Ramazan b. Yusuf mülkü ve bir tarafdan tarîk-i âm ile mahdûd iki bâb beyti süflîyi ve sofayı ve kenîfi ve bi’r-i mâyı ve muhavvatayı ve zât-ı eşcâr-ı müsmire ve gayr-ı müsmire cüneyneyi müştemil mülk menzilimi cemî‘ tevâbi‘ ve levâhık ve âmme-i menâfi‘ ve merâfıkı ile mezbûr Yusuf’a altı bin beş yüz cedîd ceyyid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi ber vech-i meşrûh üzre iştirâ ve tesellüm ettikden sonra semen-i mezbûrü’n-na‘t altı bin beş yüz akçeyi yedinden bi’t-tamâm ve’l-kemâl ahz u kabz eyledim ba‘de’l-yevm mârrü’z-zikr menzil mezbûr Yusuf’un mülk-i müşterâ-yı sahîh ve sarîhidir keyfe mâ yeşâ’ ve hasbe mâ yürîd mutasarrıf olsun dedikde mukırra-i mezbûrenin ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr Yusuf bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâlis ve’l-ışrîn min Cumâdelâhire li sene erba‘a ve hamsîn ve elf. Şuhûdü’l-hâl: Mahmud Efendi b. Mehmed el-İmâm, Ömer Halîfe b. Musa el-Müezzin, Şaban Halîfe b. Osman el-Müezzin, Süleyman b. Ahmed, İbrahim b. Tayyib, Ömer Çelebi b. Mehmed ve gayruhüm