Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 269 Hüküm no: 309 Orijinal metin no: [57a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Beşe’nin tasarrufundaki tarlayı Mehmed Beşe b. Hüseyin’e devrettiği Vilâyet-i Rumeli’nde Premedi kazâsına tâbi‘ Koblar nâm karyeden Hüseyin Beşe b. ( ) mahfil-i kazâda işbu hâmilü’l-kitâb Mehmed Beşe b. Hüseyin mahzarında bi’t-tav‘ ve’r-rızâ ikrâr ve takrîr-i kelâm edip karye-i mezbûre sınırı dâhilinde Sarayoluca? nâm mevzi‘de vâki‘ bir tarafdan Yuvan v. Koni tarlasına ve iki tarafdan David v. Papa tarlasına ve bir tarafdan Kigo v. Patko tarlasına müntehî bir kıt‘a tarlanın hakk-ı tasarrufunu sâhib-i arz ma‘rifetiyle mezbûr Mehmed Beşe’ye bin üç yüz cedîd ceyyid fıddî râyic fi’l-vakt akçe[ye] tefvîz edip ol dahi vech-i mübeyyen üzre tefevvuz ve kabûl ettikden sonra mukābele-i tefvîzde olan meblağ-ı mezbûrü’n-na‘t akçeyi merkūm Mehmed Beşe yedinden bi’t-tamâm ve’l-kemâl ahz u kabz eyledim ba‘de’l-yevm zikr olunan bir kıt‘a tarla mezbûrundur sâir emsâli tasarrufu gibi mutasarrıf olsun dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini el-mukarru lehü’l-mezbûr Mehmed Beşe bi’l-muvâcehe tasdîk edicek mâ hüve’l-vâki‘ gıbbe’l-ibtigā ketb ve imlâ olundu. Hurrire fi’l-yevmi’s-sânî ve’l-ışrîn min Cumâdelâhire li sene erba‘a ve hamsîn ve elf. Şuhûdü’l-hâl: Hüseyin Beşe b. Mehmed …?, Hüseyin Beşe b. Aydın, Sefer Beşe b. Hüseyin, Hüseyin Beşe b. Ali, Bayram Sofu ve gayruhüm mine’l-huzzâr