Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 48 Hüküm no: 3 Orijinal metin no: [1b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgo v. Dimo’nun [Dimo] v. Banko’ya? içindekilerle birlikte mülk menzilini ve bağını sattığı, tasarrufundaki üç tarlayı devrettiği Yâ Fettâh Yâ Rezzâk Yâ Vehhâb Allâhümme yâ müfettiha’l-ebvâb iftah lenâ hayre’l-bâb Vilâyet-i Rumeli’nde livâ-i Avlonya’da Ergirikasrı kazâsına tâbi‘ Sinagopolos nâm karyede sâkin Yorgo v. Dimo nâm zimmî meclis-i şer‘-i şerîf-i lâzımü’t-tevkīrde dâmâdı işbu râfi‘ü’l-vesîka [Dimo] v. Banko? nâm zimmî muvâcehesinde bi tav‘ihî ikrâr ve i‘tirâf edip silk-i mülk-i sahîhimde münselik ol[up] karye-i mezbûrede vâki‘ bir tarafdan Duka Koma mülkü ve bir tarafdan Safo Giro mülkü ve bir tarafdan Duka Kohok mülkü ve bir tarafdan tarîk-i âm ile mahdûd bir bâb fevkānî ve üç bâb tahtânî odaları ve ahırı ve anbarı ve samanlığı ve zât-ı eşcâr-ı müsmire ve gayr-ı müsmire bahçeyi müştemil mülk menzilimi cemî‘ tevâbi‘ ve levâhıkı ile ve menzil-i mezkûr içinde mevcûd üç re’s kara sığırı ineği ve iki kazgan ve iki tencere ve yedi tepsi ve on üç aded sahan ve sâ[ir] âlât-ı zirâ‘at ve esbâb-ı hirâsetimi ve yine karye-i merkūmede vâki‘ etrâf-ı erba‘adan Yorgo Pano ve Nika Lakaki? ve Vasil nâm zimmîler bağları ve vâdi ile mahdûd ve mümtâz tahmînen dokuz çapalık bir kıt‘a mülk bağımı mezbûr Dimo’ya bi safkatin vâhidetin fıddî râyic fi’l-vakt yirmi sekiz bin akçeye tarafeynden îcâb ve kabûlü hâvî bey‘-i bâtt-ı kat‘î ile bey‘ edip ol dahi vech-i mübeyyen üzre iştirâ ve kabûl eyledikden sonra yine karye-i mezbûrede mevâzi‘-i müteferrikada her birinin hudûdu beynimizde ma‘lûm üç kıt‘a tarlalarımın hakk-ı tasarruflarını dahi merkūm Dimo’ya iki bin cedîd akçe bedel mukābelesinde tefvîz ve ferağ eylediğimde ol dahi tefevvuz ve kabûl eyleyip semen-i mezbûr ile bedel-i merkūm cem‘an otuz bin mezbûru’n-na‘t akçeyi merkūm Dimo yedinden bi’t-tamâm ve’l-kemâl ahz ü kabz eylediğimden sonra emlâk-i mer[kûm] ile arâzi-i mersûmeyi mahallinde zabt ve tasarrufa tarafımdan mezbûr Dimo’yu taslît eyledim dedikde gıbbe’t[-tasdîki’]ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fi’l-yevmi’s-sâlis ve’l-ışrîn min şehri Recebi’l-ferd li sene hamsin ve sittîn ve elf. Şuhûdü’l-hâl: Ali b. Mustafa, Abdullah b. İskender, Dilâver b. Abdullah, Hüseyin b. Ali, Banko, Yorgi, Papa, Duka, Cika, Kerci, Yani, Duka, İstati, Koco, Duka, Dimo, Dedo, Dimo, Köni, Yano, Pano, Duka, ..? ve gayruhüm mine’l-hâzırîn