Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 49 Hüküm no: 4 Orijinal metin no: [1b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arslan ile Ahmed’in ninelerinden intikal eden evden ölen babaları Mehmed’in hissesi hakkında amcaları Hüseyin Beşe ile olan davalarında sulh oldukları Medîne-i Hazret-i Ebâ Eyyûb el-Ensârî -aleyhi rahmetü’l-Bârî- mahallâtından Evlice Baba mahallesi sâkinlerinden Arslan ve Ahmed ibney Mehmed nâm kimesneler meclis-i şer‘-i şerîf-i lâzımü’t-teşrîfde ammileri işbu hâmilü’l-kitâb Hüseyin Beşe b. Arslan nâm kimesne muvâcehesinde her biri ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan Arslan b. Mehmed mülkü ve bir tarafdan Mumcu Mehmed Çelebi b. Mustafa mülkü ve bir tarafdan Muslu Çelebi b. Osman mülkü ve bir tarafdan tarîk-i hâs ile mahdûd ve mümtâz olan menzil ceddemiz olup babamız ile mezbûr Hüseyin Beşe’nin vâlidesi Fâtıma bt. Kasım nâm hâtundan bi hasebi’l-irsi’ş-şer‘î intikāl edip lâkin babamız menzil-i mahdûd-ı mezkûrdan hisse-i şer‘iyyesini kabz etmeden fevt olup hisse-i mezbûre bize irsen intikāl etmişdir deyû merkūm Hüseyin Beşe’den taleb ve da‘vâ ol dahi inkâr ile cevâb vermekle beynimizde münâza‘ât-ı kesîre cereyânından sonra vesâtat-i muslihîn ile hisse-i mezbûre da‘vâsından bizi on altı kıt‘a riyâlî guruş-ı kebîr üzerine sulh eylediklerinde ben dahi sulh-ı mezbûru kabûl ve bedel-i sulh-ı mezbûru mersûm Hüseyin Beşe yedinden tamâmen ahz ü kabz edip husûs-ı mezbûra müte‘allik cemî‘ da‘vâdan zimmetini ibrâ ve iskāt eyledik min ba‘d da‘vâ ve nizâ‘ımız yokdur sudûr dahi ederse lede’l-hükkâmi’l-kirâm istimâ‘ olunmaya dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fi’l-yevmi’s-sânî ve’l-ışrîn min şehri Recebi’l-ferd li sene hamsin ve sittîn ve elf. Şuhûdü’l-hâl: Şaban Bey b. Mustafa, Nasuh Beşe b. Mehmed, Mehmed Çelebi b. Mustafa, Ebûbekir Beşe b. Ali, Mahmud Beşe b. Ali, el-Hâc Mehmed b. Zülfikar, Ömer Beşe b. Osman, Ali Beşe b. Ebîbekir ve gayruhüm