Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 49 Hüküm no: 5 Orijinal metin no: [2a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Efendi b. Haydar’ın Abdüllatif Bey b. Mehmed Paşa’daki alacağını tahsil ettiği Husûs-ı âti’z-zikrin mahallinde ketb ve terkīmi iltimâs olunmağın cânib-i şer‘-i kavîmden fahrü’l-kuzât Mevlânâ Mehmed Efendi b. Nasuh Ağa irsâl olunup ol dahi zeyl-i kitâbda isimleri mastûr olan müslimîn ile medîne-i Hazret-i Ebâ Eyyûb el-Ensârî’de Câmi‘-i kebîr mahallesi sâkinlerinden umdetü’l-emâsil ve’l-akrân Mehmed Ağa b. Abdülmennân nâm müteferrikanın menziline varıp akd-i meclis-i şer‘ eyledikde vilâyet-i Anadolu’da medîne-i Ankara’da Pazar-ı ganem mahallesi sükkânından olup yine vilâyet-i mezbûrede muvakkaten Hân-ı cedîd kadısı olan mefharü kuzâti’l-İslâm Ali Efendi b. Haydar nâm kadı meclis-i mezbûrede işbu râfi‘ü’l-kitâbi’l-müstetâb kapıcıbaşılarından iftihârü’l-emâcid ve’l-ekârim Abdüllatîf Bey b. el-merhûm el-mebrûr ed-dâric Mehmed Paşa mahzarında bi’t-tav‘ ve’r-rızâ ikrâr-ı tâm ve ta‘bîr ani’l-merâm edip müşârun-ileyh Abdüllatîf Bey zimmetinde cihet-i deyn-i şer‘îden iki yük seksen bin cedîd akçe hakkım olup hâlen meblağ-ı mezbûr iki yük seksen bin akçeyi müşârun-ileyh Abdüllatîf Bey yedlerinden bi’t-tamâm ve’l-kemâl ahz ü kabz eyledim ba‘de’l-yevm müşârun-ileyh Abdüllatîf Bey zimmetlerinde bir akçe ve bir habbe hakkım kalmadı dedikde mukırr-ı mezbûrun minvâl-i mübeyyen üzre cârî ve sâdır olan ikrârını müşârun-ileyh Abdüllatîf Bey bi’l-muvâcehe tasdîk ve bi’l-müşâfehe tahkīk eylediğini Mevlânâ-yı mûmâ-ileyh mahallinde tahrîr ba‘dehû gelip meclis-i şer‘de alâ vukū‘ihî inhâ ve takrîr etmeğin mâ hüve’l-vâki‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min şehri Recebi’l-ferd li sene hamsin ve sittîn ve elf. Şuhûdü’l-hâl: Fahrü’l-eşbâh Mehmed Ağa b. Abdülmennân, zahrü’l-a‘yân Osman Ağa b. Hüseyin, Ahmed Bey b. Osman, Hüseyin Efendi b. Abdülmü’min, Mehmed Çelebi b. Hasan el-Kâtib, Ali Çelebi b. el-Hâc Mehmed, Hasan b. Abdullah, Mustafa Beşe pazarbaşı sâbıkan, Mehmed Ağa ah-ı Mehmed Ağa el-mezbûr, Dilâver b. Abdullah ve gayruhüm mine’l-hâzırîn