Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 50 Hüküm no: 6 Orijinal metin no: [2a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdüllatif Bey b. Mehmed Paşa’nın Ali Efendi b. Haydar’a borcu olduğunu ikrarı Husûs-ı âti’z-zikrin mahallinde tahrîri iltimâs olunmağın savb-ı şer‘-i şerîfden umdetü’l-kuzât Mevlânâ Mehmed Efendi b. Nasuh Ağa irsâl olunup ol dahi zeyl-i vesîkada muharrerü’l-esâmî müslimîn ile Medîne-i Hazret-i Ebâ Eyyûb el-Ensârî’de Câmi‘-i kebîr mahallesi sükkânından fahrü’l-emâsil ve’l-akrân Mehmed Ağa b. Abdülmennân nâm müteferrikanın menziline varıp akd-i meclis-i şer‘ eyledikde Dergâh-ı âlî -dâme mahfûfen bi’l-me‘âlî- kapıcıbaşılarından iftihârü’l-emâcid ve’l-ekârim Abdüllatîf Bey b. el-merhûm el-mebrûr ed-dâric Mehmed Paşa meclis-i mezkûrda işbu kitâb-ı sıhhat-nisâbın sâhibi olup muvakkaten vilâyet-i Anadolu’da Hân-ı cedîd kadısı olan Ali Efendi b. Haydar nâm kadı mahzarında bi tav‘ihî ikrâr ve i‘tirâf edip târih-i kitâbdan kırk gün tamâmına değin müeccel ve mev‘ûd iki tahta samur kürk bahâsından mezbûr Ali Efendi’ye kırk bin fıddî râyic fi’l-vakt akçe zimmetimde lâzımü’l-edâ ve vâcibü’l-kazâ deynim vardır dedikde mukırr-ı mezbûrun minvâl-i meşrûh üzre cârî ve sâdır olan ikrârını mûmâ-ileyh Ali Efendi bi’l-muvâcehe tasdîk ve bi’l-müşâfehe tahkīk eylediğini Mevlânâ-yı mezbûr mahallinde ketb ü terkīm ba‘dehû gelip meclis-i şer‘de alâ vukū‘ihî inhâ ve takrîr etmeğin mâ hüve’l-vâki‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min şehri Recebi’l-ferd li sene hamsin ve sittîn ve elf. Şuhûdü’l-hâl: Fahrü’l-emsâl Mehmed Ağa b. Abdülmennân, Osman Ağa b. Hüseyin, Ahmed Bey b. Osman, Hüseyin Efendi b. Abdülmü’min, Mehmed Çelebi b. Hasan el-Kâtib, Ali Çelebi b. el-Hâc Mehmed, Hasan Beşe b. Abdullah, Mustafa Beşe pazarbaşı sâbıkan, Mehmed Ağa ah-ı diğer Mehmed Ağa el-mezbûr, Dilâver Beşe b. Abdullah ve gayruhüm mine’l-hâzırîn