Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 51 Hüküm no: 7 Orijinal metin no: [2a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Ağa b. Hüseyin’in mülk evini Osman Bey b. Mustafa’ya sattığı Medîne-i Hazret-i Ebâ Eyyûb el-Ensârî -aleyhi rahmetü’l-Bârî-de Zal Mahmud Paşa Câmi‘-i şerîfi kurbunda Mehmed Bey el-Hamzavî mahallesinde sâkin fahrü’l-emâcid ve’l-emsâl Osman Ağa b. Hüseyin meclis-i şer‘de işbu râfi‘ü’l-kitâb diğer Osman Bey b. Mustafa tarafından husûs-ı âti’z-zikri tasdîke vekîl-i sâbitü’l-vekâle olan fahrü’l-hutebâ Hüseyin Efendi b. Abdülmü’min nâm vekîl muvâcehesinde ikrâr ve i‘tirâf edip medîne-i mezbûrede Bıçakçı Ferhad mahallesinde vâki‘ bir tarafı Abdünnebi b. ( ) mülkü ve bir tarafı Topal Şaban Efendi tasarrufunda olan vakıf menzil ve iki [tarafı] tarîk-i âm ile mahdûd iki bâb fevkānî odaları ve kenîf ve üç tahtânî odaları ve iki sofayı ve bir câmekânıyla hamamı ve iki kıt‘a kenîfi ve zât-ı eşcâr-ı müsmire ve gayr-ı müsmire hadîkayı müştemil olan mülk menzilimi cümle tevâbi‘ ve levâhıkı ile müvekkil-i müşârun-ileyh Osman Bey’e tarafeynden îcâb ve kabûlü hâvî bey‘-i bâtt-ı sahîh-i şer‘î ile doksan bin cedîd akçeye bâtten bey‘ ve teslîm müvekkil-i müşârun-ileyh dahi minvâl-i mübeyyen üzre iştirâ ve tesellüm ve kabûl ve kabz eyledikden sonra semeni olan meblağ-ı mezbûr doksan bin akçeyi müvekkil-i müşârun-ileyh Osman Bey yedinden tamâmen alıp kabz eyledim ba‘de’l-yevm [2b] menzil-i mahdûd-ı mezkûrda benim vechen mine’l-vücûhi’ş-şer‘iyye ve sebeben mine’l-esbâbi’l-mer‘iyye alâka ve medhalim yokdur müşârun-ileyh Osman Bey’in mülk-i müşterâsı olmuşdur keyfemâ yeşâ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min şehri Recebi’l-ferd li sene hamsin ve sittîn ve elf. Şuhûdü’l-hâl: Umdetü’l-eşbâh Mehmed Ağa b. Abdülbâkī, Osman b. Hüdâverdi, Ahmed Bey b. Osman, Mehmed Çelebi b. Hasan el-Kâtib, Ali Çelebi b. el-Hâc Mehmed, Mustafa Beşe b. Abdullah, Mehmed Ağa ah-ı mezbûr Mehmed Ağa ve gayruhüm [mine’l-hâzırîn?].