Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 51 Hüküm no: 8 Orijinal metin no: [2b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Abdullah ile zevcesi Ümmühâni Hâtun bt. Mustafa’nın Fâtıma Hâtun bt. Mustafa’ya ortak oldukları çiftlikteki mülklerini sattıkları ve tarlaların tasarruf hakkını devrettikleri Havâss-ı Kostantıniyye kazâsına tâbi‘ Küçük Halkalı demekle ma‘rûf karye sâkinlerinden olup zikri câ’î çiftlikden üç sehimden bir sehim hisseye mutasarrıf olan Mustafa Beşe b. Abdullah ile iki sehim hisseye mutasarrıfe olan zevcesi Ümmühâni Hâtun bt. Mustafa meclis-i şer‘-i şerîf-i lâzımü’t-teşrîfde işbu hâmiletü’l-kitâb fahrü’l-muhadderât Fâtıma Hâtun bt. Mustafa muvâcehesinde her biri ikrâr ve i‘tirâf edip tafsîl olunduğu minvâl üzre mülkümüz olup karye-i merkūmede vâki‘ cevânib-i erba‘ası tarîk-i âm ile mahdûd iki bâb tahtânî odaları ve bir kıt‘a ahırı ve bir kıt‘a harman yerini ve zât-ı eşcâr-ı müsmire ve gayr-ı müsmire hadîkayı müştemil mülk menzilimizi ve içinde mevcûd üç re’s kara sığırı ineklerini ve üç buzağıyı bi safkatin vâhidetin merkūme Fâtıma Hâtun’a yirmi sekiz bin -28.000- cedîd akçeye bey‘-i kat‘î ile bâtten bey‘ ve tesl[î]m ol dahi ber vech-i mübeyyen iştirâ ve tesellüm ve kabûl ve kabz eyledikden sonra yine karye-i mezbûrede vâki‘ her birinin hudûdu beynimizde ma‘lûm sekiz kıt‘a tarlalarımızın hakk-ı tasarruflarını dahi merhûm Sultan Bayezid Hân Hazretleri Evkāfı arâzisinden olmağla mütevellîsi ma‘rifetiyle merkūme Fâtıma Hâtun’a beş bin -5000- cedîd akçe bedel mukābelesinde tefvîz bi’l-ferağ eylediğimizde mersûme Fâtıma Hâtun dahi vech-i muharrer üzre tefevvuz ve kabûl eyledikden sonra semen-i merkūm ile bedel-i mezbûr cem‘an otuz üç bin akçeyi mesfûre Fâtıma Hâtun yedinden bi’t-tamâm ve’l-kemâl alıp kabz eyledik ba‘de’l-yevm emlâk-i merkūme mezbûre Fâtıma Hâtun’un emlâk-i müş[te]râsı olmuşdur keyfemâ teşâ mutasarrıfe ola ve ol tarlalar dahi dâhil-i taht-ı tasarrufu olmuşdur emsâli tasarrufu gibi mutasarrıfe olsun dediklerinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min şehri Recebi’l-ferd li sene hamsin ve sittîn ve elf. Şuhûdü’l-hâl: Hasan Efendi b. Resul, Muharrem Usta b. Ahmed, Ramazan Beşe b. Receb, Durmuş Beşe b. Tâlib, Mustafa Beşe b. Abdullah, İbrahim Beşe b. Arslan, Ahmed Beşe el-Bostânî, Mahmud el-Bostânî, Yusuf Beşe el-Bostânî, Ali Beşe b. Mustafa, Hüseyin Çelebi b. Ali ve gayruhüm mine’l-hâzırîn