Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 53 Hüküm no: 10 Orijinal metin no: [2b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul patriği Yuanikiyos v. Manol’un Cafer Ağa b. Hasan’a borcu olduğu ve vade sonunda ödenmesine metrepolidler ile bazı şahısların kefil oldukları Husûs-ı câ’i’z-zikrin mahallinde ketb ve terkīmi iltimâs olunmağın cânib-i şer‘-i kavîmden fahrü’l-kuzât Mevlânâ Mehmed Efendi b. Nasuh Ağa irsâl olunup ol dahi zeyl-i kitâbda isimleri mastûr olan müslimîn ile medîne-i Hazret-i Ebâ Eyyûb el-Ensârî’de Câmi‘-i kebîr mahallesi sâkinlerinden mefharü’l-ekârim ve’l-e‘âlî Cafer Ağa b. Hasan nâm kimesnenin sâkin olduğu menzile varıp akd-i meclis-i şer‘ eyledikde mahrûse-i İstanbul patriği olan Yuanikiyos v. Manol nâm nasrânî meclis-i mezkûrda işbu hâmilü’l-kitâbi’l-müstetâb müşârun-ileyh Cafer Ağa mahzarında bi’t-tav‘ ve’r-rızâ ikrâr-ı tâm ve takrîr-i kelâm edip [3a] târih-i kitâbdan iki yüz yetmiş gün tamâmına değin müeccel ve mev‘ûd cihet-i deyn-i şer‘îden müşârun-ileyh Cafer Ağa’ya bin beş yüz kıt‘a riyâlî kebîr guruş zimmetimde lâzımü’l-edâ ve vâcibü’l-kazâ deynim vardır dedikde mukırr-ı mezbûrun minvâl-i muharrer üzre cârî ve sâdır olan ikrârını müşârun-ileyh Cafer Ağa bi’l-muvâcehe tasdîk ve bi’l-müşâfehe tahkīk eyledikden sonra yine mahrûse-i merkūmede kürkçü tâ’ifesinden Duka v. Panayot ve Yani v. Dimo ve Pavlo v. Andon ve Anastaş v. Adam ve kasaba-i Tırnovi metrepolidi Diyonisyos v. Manol ve Gördos metrepolidi Grigor v. Kosta ve Dimetoka metrepolidi Yakovas v. Yorgi ve Bursa metrepolidi Partenyoz v. Mihal ve Mezistre metrepolidi Gavril v. Yorgi ve Ilıca metrepolidi Teodosyos v. Andon ve Yenişehir metrepolidi Diyonisyos v. Yani ve İzmir metrepolidi Makaryoz v. Miho ve Silistre metrepolidi diğer Makaryoz v. Nikola ve Marmara metrepolidi Yeremya v. Hıristodlo ve Filibe metrepolidi Gavril v. İstefano ve Edirne metrepolidi Neofito v. Mihal ve Manisa metrepolidi Ignetyoz v. Nikola ve İznikmid metrepolidi Krilos v. Nikola ve Ereğli metrepolidi Mesodiyo v. Yani nâm nasrânîler müşârun-ileyh Cafer Ağa muvâcehesinde her biri tav‘an ikrâr ve i‘tirâf edip meblağ-ı merkūmü’l-vasf bin beş yüz riyâlî guruşa tarafeynden emr ve kabûlü hâvî kefâlet-i sahîha[-i] şer‘iyye ile her birimiz kefîl bi’l-mâl olduk dediklerinde vâki‘ hâli Mevlânâ-yı mûmâ-ileyh mahallinde tahrîr ba‘dehû gelip meclis-i şer‘de alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min şehri Recebi’l-ferd li sene hamsin ve sittîn ve elf. Şuhûdü’l-hâl: Osman Ağa b. Ferhad, Şaban Dede b. Mehmed, el-Hâc Pîrî Beşe b. Abdullah, Osman Bey b. Ahmed, Mustafa Çelebi b. Mehmed el-Attâr, Ali Beşe b. Abdullah, Mahmud Beşe b. Abdullah ve gayruhüm mine’l-hâzırîn