Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 54 Hüküm no: 12 Orijinal metin no: [3a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Mustafa Ağa b. Abdullah’ın vârislerinin Mustafa Ağa’nın kethüdâsı Hasan Bey b. Ali’nin elinde olan miras malıyla ilgili davadan sulh oldukları Mahrûse-i İstanbul’da Acem Ağa mahallesi sâkinlerinden olup bundan akdem vefât eden Mustafa Ağa b. Abdullah nâm kimesnenin verâseti li ebeveyn kız karındaşları Âişe ve Emine ve Fâtıma nâm hâtunlar ile li ebeveyn er karındaşı oğulları Hasan ve Ali nâm kimesnelere münhasıra olduğu şer‘an zâhir ve müte‘ayyin oldukdan sonra mezbûrât Âişe ve Fâtıma ve Emine ile merkūmân Hasan ve Ali taraflarından husûs-ı âti’z-zikri sulh ve ibrâya vekîlleri olup Mehmed Beşe b. Ahmed ve Ramazan b. Mehmed nâm kimesneler şehâdetleriyle şer‘an vekâleti sâbite olan Hüseyin Efendi b. Abdullah nâm vekîl meclis-i şer‘-i şerîf-i lâzımü’t-tevkīrde müteveffâ-yı mezbûr Mustafa Ağa’nın kethüdâsı ve muhallefâtına vaz‘-ı yed eden işbu râfi‘ü’l-kitâb Hasan Bey b. Ali nâm cündî mahzarında bi’l-vekâle ikrâr-ı tâm ve ta‘bîr ani’l-merâm edip mezbûr Hasan Bey müvekkilûn-ı mezbûrûnun mûrisleri olan müteveffâ-yı merkūm Mustafa Ağa’nın muhallefâtına vaz‘-ı yed etmekle mezbûr Hasan Bey’den mukaddemâ iki yüz elli aded altın ve bir sîm raht ve bir zümrüd taşlı hâtem ve bir kanaviz yağmurluk ve bir kırmızı ferâce ve bir eyer ve bir donluk yeşil kadife vekâlet-i mahkiyem hasebiyle taleb ve da‘vâ eylediğimde ol dahi inkâr ile cevâb vermeğin beynimiz[d]e münâza‘ât-ı kesîre ve muhâsamât-ı şedîde cereyânından sonra vesâtat-i muslihîn ile da‘vâ-yı mezkûreden vekâletim hasebiyle beni yüz elli kıt‘a riyâlî kebîr guruş üzerine sulh eylediklerinde ol dahi sulh-ı mezbûru kabûl ve bedel-i sulh olan meblağ-ı merkūmü’l-vasf yüz elli guruşu mezbûr Hasan Bey yedinden bi’t-tamâm ve’l-kemâl ahz ü kabz [3b] eyledim ba‘de’l-yevm mezbûr Hasan Bey zimmetinde müteveffâ-yı mezbûrun bir akçe ve bir habbesi kalmadı vekâletim hasebiyle mezbûr Hasan Bey’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde mukırr-ı mezbûrun bi’l-vekâle cârî ve sâdır olan ikrârını mezbûr Hasan Bey vicâhen ve şifâhen tasdîk ve tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min şehri Recebi’l-mürecceb li sene hamsin ve sittîn ve elf. Şuhûdü’l-hâl: Ali Efendi b. Mustafa, Receb Efendi b. Abdi, Hasan Çelebi b. Abdullah, Mustafa b. Memi, Derviş Bey b. Abdullah el-Bevvâbü’s-sultânî, Mustafa Bey el-Cündî, Ali Beşe b. Mustafa, Dilâver Beşe b. Abdullah, Abdullah Beşe b. İskender, Hüseyin Çelebi b. Ali ve gayruhüm mine’l-hâzırîn