Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 55 Hüküm no: 13 Orijinal metin no: [3b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hıristo v. Duka’nın kardeşi Panko’ya mülk bağını ve harman yerini sattığı ve arâzi hissesinin tasarruf hakkını devrettiği Vilâyet-i Rumeli’nde livâ-i Avlonya’da Ergirikasrı kazâsına tâbi‘ Haskova nâm karyede sâkin Hıristo v. Duka nâm nasrânî meclis-i şer‘-i şerîf-i lâzımü’t-tevkīrde li ebeveyn er karındaşı işbu râfi‘ü’l-vesîka Panko nâm zimmî muvâcehesinde bi tav‘ihî ikrâr ve i‘tirâf edip emlâkimden olup karye-i mezbûrede vâki‘ etrâf-ı erba‘adan Sağlo Duka ve Panko ve Arto ve Nikozto nâm zimmîler bağları ile mahdûd ve mümtâz tahmînen beş çapalık bir kıt‘a mülk bağımı ve yine karye-i mezbûrede vâki‘ bir tarafdan Dimo Hırsako mülkü ve iki tarafdan Hıristo Yani ve taraf-ı râbi‘i tarîk-i âm ile mahdûd bir kıt‘a harman yerimi dahi karındaşım merkūm Panko’ya dört bin fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyledikden sonra yine karye-i merkūme sınırı dâhilinde mevâzi‘-i müteferrikada vâki‘ inde’l-ahâlî ve’l-cîrân ma‘lûmü’l-hudûd ve’l-mikdâr olup tahmînen on dönüm arâzide olan rub‘ hisse-i şâyi‘amın dahi hakk-ı tasarrufunu sâhib-i arz ma‘rifetiyle mezbûr Panko’ya üç bin cedîd akçe bedel mukābelesinde tefvîz ve ferağ eylediğimde ol dahi tefevvuz ve kabûl eyleyip semeni mezbûr ile bedel-i mezkûr cem‘an yedi bin akçeyi merkūm Panko yedinden tamâmen ahz ü kabz eylediğimden sonra mebî‘ayn-i mezkûreyn ile arâzi-i merkūmede olan rub‘ hisse-i şâyi‘amı mahallinde zabt ve tasarrufa merkūm Panko’yu taslît eyledim dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min şehri Recebi’l-ferd li sene hamsin ve sittîn ve elf. Şuhûdü’l-hâl: Ali b. Mustafa, Hüseyin b. Ali, Dilâver b. Abdullah, Abdullah b. İskender ve gayruhüm mine’l-hâzırîn Hıristo, Laluç, Duka, Nika, Göni, Hıristo, Yani, Hıristo, Yorgo, Göni, Kondi, Dimo, Kirko, Todori, Yani, Hıristo ve gayr