Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 56 Hüküm no: 14 Orijinal metin no: [3b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fedâyî Hâtun bt. Abdullah’ın Ali Bey’den muhâlaa ile boşandığı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Sofular mahallesi sâkinelerinden Fedâyî Hâtun bt. Abdullah nâm hâtun meclis-i şer‘-i şerîf-i lâzımü’t-tevkīrde zevci işbu râfi‘ü[‘l-]kitâb Ali Bey b. Rıdvan nâm kimesne mahzarında bi tav‘ihâ ikrâr-ı tâm ve takrîr-i kelâm edip zevcim mezbûr Ali Bey ile hüsn-i zindegânemiz olmayıp beynimizde şikāk-ı küllî vâki‘ olmağın zimmetinde mütekarrir olan elli kıt‘a riyâlî kebîr guruş mehr-i müeccelimden ve nafaka-i iddet ve me’ûnet-i süknâmdan fâriğa olmak üzre merkūm Ali Bey ile muhâla‘a-i sahîha-i şer‘iyye ile muhâla‘a eyleyip zimmetini zevciyete müte‘allik âmme-i da‘vâdan ibrâ ve iskāt eyledim dedikde ol dahi minvâl-i meşrûh üzre olan hul‘ı kabûl ve ahadühümâ âharı zevciyete müte‘allik cemî‘ de‘âvî ve mütâlebâtdan ibrâ ve iskāt eyledik[de] gıbbe’t-tasdîki’ş-şer‘î mâ vaka‘a bi’t-taleb ketb olundu. Fî evâhiri şehri Recebi’l-ferd li sene hamsin ve sittîn ve elf. Şuhûdü’l-hâl: Mehmed Çelebi b. Perviz, Süleyman b. Abdullah, Ali Beşe b. Mustafa, Abdullah b. İskender, Hüseyin b. Ali ve gayruhüm mine’l-hâzırîn