Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 56 Hüküm no: 15 Orijinal metin no: [3b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Kulu’nun evini Hüseyin b. Hasan’ın vasîsi Cafer’e bey‘ bi’l-istiğlâl yoluyla sattığı Havâss-ı refî‘a kazâsına tâbi‘ Küçükköy demekle ma‘rûf karyede sâkin Yani v. Kulu nâm nasrânî meclis-i şer‘-i şerîf-i lâzımü’t-tevkīrde Hüseyin b. Hasan nâm sagīrin kıbel-i şer‘den mansûb vasîsi olan işbu hâmilü’l-kitâb Cafer b. Ahmed nâm kimesne mahzarında bi’t-tav‘ ve’r-rızâ ikrâr-ı tâm ve takrîr-i kelâm edip silk-i mülkümde münselik olup karye-i mezbûrede vâki‘ bir tarafdan İsteryanoz mülkü ve bir tarafdan Pano mülkü ve bir tarafdan Roso çayırı ve bir tarafdan tarîk-i âm ile mahdûd mülk menzilimi bi cümleti’t-tevâbi‘ ve’l-levâhık vasiyy-i mezbûr Cafer’e bi tarîki’l-istiğlâl yüz kıt‘a riyâlî kebîr guruşa bey‘ ve teslîm edip ol dahi sagīr-i mezbûr mâlıyla vech-i muharrer üzre iştirâ ve tesellüm ve kabûl eyleyip semeni olan merkūmü’l-vasf yüz guruşu mezbûr Cafer yedinden bi’t-tamâm ve’l-kemâl ahz ü kabz eylediğimden sonra yine menzil-i mezkûru ba‘de’t-tahliye ve’t-tekābuz vasiyy-i merkūm târih-i kitâbdan bir sene tamâmına değin on beş guruş icâre ile bana îcâr ve teslîm ben dahi vech-i mübeyyen üzre istîcâr ve tesellüm ve kabûl eyledim dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb olundu. Fî gurreti Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Ali Beşe b. Mustafa, Bayram Sofu b. Mehmed, Abdullah Beşe b. İskender, Hüseyin Beşe b. Ali ve gayruhüm mine’l-hâzırîn