Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 57 Hüküm no: 16 Orijinal metin no: [4a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Dimo’nun alacaklı olduğu Nikola v. Rizo’nun borcunu kefili olan babası Rizo’nun ödemesi gerektiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Çömlekçiler sûkunda bakkal tâ’ifesinden işbu hâmilü’l-vesîka Yani v. Dimo nâm nasrânî meclis-i şer‘-i şerîf-i lâzımü’t-tevkīrde Rizo v. Todori nâm zimmî muvâcehesinde üzerine da‘vâ ve takrîr-i kelâm edip mezbûr Rizo’nun sulbî kebîr oğlu gāib ani’l-meclis Nikola nâm zimmî zimmetinde cihet-i sermâyeden on bin beş yüz akçe hakkım olup merkūm Rizo meblağ-ı mersûma emr ve kabûlü hâviye kefâlet-i sahîha[-i] şer‘iyye ile kefîl bi’l-mâl olmuşidi, hâlen meblağ-ı mezbûru kefâleti hasebiyle merkūm Rizo’dan taleb eylediğimde edâdan imtinâ‘ eder suâl olunup alıverilmesi murâdımdır dedikde gıbbe’s-suâl ve akībe’l-inkâr müdde‘î-i mezbûr Yani’den da‘vâsını mübeyyine beyyine taleb olundukda yine tâ’ife-i merkūmeden Yani v. Rizo ve Mavridi v. Rizo ve Yani v. Petro nâm zimmîler meclis-i şer‘a li ecli’ş-şehâde hâzırûn olup istişhâd olunduklarında fi’l-hakīka müdde‘î-i mezbûrun gāib-i mersûm Nikola zimmetinde olan on altı bin mezbûru’n-na‘t akçeye merkūm Rizo minvâl-i meşrûh üzre bizim huzûrumuzda kefîl bi’l-mâl oldu biz bu husûsa vech-i mübeyyen üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde isre ri‘âyeti şerâ’iti’l-kabûl şehâdetleri makbûle ve mesmû‘a oldukdan sonra mûcebiyle müdde‘î-i merkūma meblağ-ı mezbûru edâsıyla mersûm Rizo ilzâm olunup mâ hüve’l-vâki‘ bi’l-ibtigā ketb olundu. Fî gurreti Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: es-Seyyid Mehmed Çelebi b. Veli, Ali Beşe b. Ramazan, Abdullah Beşe b. İskender, Hüseyin Çelebi b. Ali, Mustafa Beşe b. Abdullah çukadâr ve gayruhüm mine’l-hâzırîn.