Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 58 Hüküm no: 17 Orijinal metin no: [4a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Abdullah’ın zevci Hüseyin b. Mehmed’den muhâlaa ile boşandığı Havâss-ı aliyye kazâsına tâbi‘ Kağıthâne demekle ma‘rûf karye sâkinlerinden Emine bt. Abdullah nâm hâtun meclis-i şer‘-i şerîf-i enverde zevci işbu râfi‘ü’l-kitâb Hüseyin b. Mehmed nâm kimesne mahzarında bi tav‘ihâ ikrâr-ı tâm ve takrîr-i kelâm edip zevcim mezbûr Hüseyin ile beynimizde şikāk-ı küllî vâki‘ olmağla zimmetinde mütekarrir olan iki yüz akçe mehr-i müeccelimden ve nafaka-i iddet ve me’ûnet-i süknâmdan fâriğa olmak üzre ve yine cihet-i deyn-i şer‘îden zimmetinde olan bin akçe hakkımdan geçip zevcim mezbûr Hüseyin ile muhâla‘a-i sahîha-i şer‘iyye ile muhâla‘a eylediğimden sonra bedel-i hul‘ olmak üzre bir re’s kara sığırı ineğimi yedine teslîm edip ol dahi kabz ve tesellüm eyledikden sonra zimmetini zevciyete müte‘allik da‘vâdan ibrâ ve iskāt eyledim dedikde ol dahi minvâl-i meşrûh üzre olan hul‘ı kabûl ettikden sonra ben dahi merkūme Emine’nin zimmetini zevciyete müte‘allik de‘âvî ve mütâlebât ve eymân-ı muhâsamâtdan ibrâ-i âmm-ı kātı‘ü’n-nizâ‘la ibrâ ve iskāt eyledim dedikde ahadühümâ âharın minvâl-i mübeyyen üzre cereyân eden ikrâr ve takrîrini vicâhen ve şifâhen tasdîk ve tahkīk etmeğin mâ hüve’l-vâki‘ bi’l-ibtigā ketb olundu. Fî gurreti Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Hasan Beşe b. Abdullah, Ali Beşe b. Mustafa, Dilâver Bey b. Abdullah el-Muhtesib, Abdi Beşe b. İskender, Mustafa Beşe b. Abdullah çukadâr ve gayruhüm mine’l-hâzırîn