Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 58 Hüküm no: 18 Orijinal metin no: [4a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. İsa’nın mülk evinin Ali Beşe b. Bâli’ye satılması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî- mahallâtından Şah Sultan mahallesi sâkinelerinden Belkıs bt. İsâ nâm hâtun tarafından bey‘-i câ’i’z-zikri ikrâra vekîl olup mezbûrenin zâtını ma‘rifet-i şer‘iyye ile ârifân olan Receb Efendi b. Abdi el-Müderris ve Ahmed Beşe b. Yusuf nâm kimesneler şehâdetleriyle şer‘an vekâleti sâbite olan Mehmed b. Ahmed nâm vekîl meclis-i şer‘-i şerîf-i enverde işbu râfi‘ü’l-kitâb Ali Beşe b. Bâli nâm kimesne mahzarında bi’l-vekâle ikrâr-ı tâm ve ta‘bîr ani’l-merâm edip müvekkilem mezbûre Belkıs Hâtun silk-i mülk-i sahîhinde münselik olup medîne-i mezbûrede Çavuş Kasım mahallesinde vâki‘ bir tarafdan Ağlamış nâm kimesne mülkü ve bir tarafdan Perviz b. Abdullah mülkü bir tarafdan bayır ve bir tarafdan tarîk-i âm ile mahdûd iki bâb fevkānî ve iki bâb tahtânî odaları ve bir sofayı ve bi’r-i mâ’ı ve zât-ı eşcâr-ı müsmire ve gayr-ı müsmire bahçeyi müştemil mülk menzilini mezbûr Ali Beşe’ye on altı bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûru’n-na‘t on altı bin akçeyi mezbûr Ali Beşe yedinden tamâmen ahz ü kabz eyledim ba‘de’l-yevm menzil-i mahdûd-ı mezkûrda benim vechen mine’l-vücûhi’ş-şer‘iyye alâkam kalmadı mezbûr Ali Beşe’nin mülk-i müşterâsıdır keyfemâ yeşâ ve hasbemâ yehtâr mutasarrıf olsun dedi dedikde mukırr-ı mezbûrun minvâl-i muharrer üzre bi’l-vekâle cârî ve sâdır olan ikrârını el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’l-ibtigā ketb olundu. Fî gurreti Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Hüseyin Efendi b. Mehmed el-İmâm, İbrahim Beşe b. İsmail, Hüseyin b. Eyüb, Ömer b. Eyüb, Süleyman b. Ömer, Hasan b. Abdullah, Mahmud Beşe b. Yusuf er-Râcil, Ahmed Beşe b. Yusuf, Abdullah Beşe b. İskender, Oruc b. ( ) ve gayruhüm mine’l-hâzırîn