Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 60 Hüküm no: 20 Orijinal metin no: [4b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rıdvan b. Abdülbâki’nin Ömer Beşe b. Eyüp’e altı bin akçesini hibe ettiği Mahrûse-i İstanbul’da Müftü Ali Çelebi mahallesi sâkinlerinden Rıdvan b. Abdülbâkī nâm kimesne meclis-i şer‘-i şerîf-i lâzımü’t-teşrîfde işbu râfi‘ü’l-kitâb Ömer Beşe b. Eyüb nâm kimesne mahzarında bi’t-tav‘ ve’l-ihtiyâr lâ bi’l-kerh ve’l-icbâr ikrâr-ı tâm ve takrîr-i kelâm ve ifâde-i merâm edip mülk-i mahz-ı sarîhim olup işbu mevcûd bi’l-meclis olan altı bin akçemi mezbûr Ömer Beşe’ye hibe-i sahîha-i şer‘iyye ile hibe ve teslîm ve temlîk eylediğimde mezbûr Ömer Beşe dahi meclis-i hibede minvâl-i mübeyyen üzre ittihâb ve tesellüm ve kabûl ve kabz edip mukābelesinde bir çuka dolama bana ivaz verip ben dahi ol dolamayı ivaz olmak üzre kabz ve kabûl eyledim ba‘de’l-yevm meblağ-ı mezbûrda vechen mine’l-vücûhi’ş-şer‘iyye ve sebeben mine’l-esbâbi’l-mer‘iyye benim alâka ve medhalim yokdur mezbûr Ömer Beşe’nin mülk-i mevhûbudur keyfemâ yeşâ ve hasbemâ yehtâr mutasarrıf olsun dedikde mukırr-ı mezbûr Rıdvan Beşe’nin vech-i meşrûh üzre cârî ve sâdır olan cemî‘ ikrâr ve i‘tirâfını merkūm Ömer Beşe vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fî gurreti Şa‘bâni’l-mu‘azzam min şuhûri sene hamsin ve sittîn ve elf. Şuhûdü’l-hâl: Mustafa Efendi b. Hasan el-Müderris, Ahmed Efendi b. İbrahim Efendi, Ahmed Halîfe b. Mehmed el-Müezzin, Ali Çelebi b. Mehmed el-Kayyım, Abdullah Beşe b. Mehmed, Receb Beşe b. Hasan, Halil Beşe b. Muharrem ve gayruhüm mine’l-hâzırîn