Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 60 Hüküm no: 21 Orijinal metin no: [4b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zâhide Hâtun bt. Ahmed’in mülk menzilinin Mehmed Efendi b. Surûrî’ye satılması Mahrûse-i Kostantıniyye hısnı ebvâbından Yenikapı hâricinde Emânî Çelebi mahallesi sâkinelerinden Zâhide Hâtun bt. Ahmed tarafından bey‘-i câ’i’z-zikri ikrâra vekîl olup mezbûrenin zâtını ma‘rifet-i şer‘iyye ile ârifân olan Mehmed Çelebi b. Yusuf el-Müezzin ve Ahmed Efendi b. Muslihiddin şehâdetleriyle şer‘an vekâleti sâbite olan fahrü’l-eşbâh Mustafa Çelebi b. Mehmed nâm vekîl meclis-i şer‘-i şerîf-i enverde işbu râfi‘ü’l-kitâbi’l-müstetâb Mehmed Efendi b. Surûrî mahzarında bi’l-vekâle ikrâr-ı tâm ve ifâde-i merâm edip müvekkilem merkūme Zâhide Hâtun silk-i mülk-i sahîhinde münselik olup mahalle-i mezbûrede vâki‘ bir tarafdan Saliha Hâtun mülkü ve bir tarafdan Receb Paşa veresesi mülkü ve tarafeyni tarîk-i âm ile mahdûd bir bâb tahtânî odayı ve bi’r-i mâ’ı ve zât-ı eşcâr-ı müsmire gayr-ı müsmire bahçeyi müştemil mülk menzilini cemî‘ tevâbi‘ ve levâhıkı ile mezbûr Mehmed Efendi’ye on dört bin fıddî râyic fi’l-vakt akçe ile hîn-i kabzda muzî‘a bir kabza fülûs-ı mechûletü’l-kadre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûru merkūm Mehmed Efendi yedinden tamâmen ahz ü kabz eyledim ba‘de’l-yevm menzil-i mahdûd-ı mezkûrda vechen mine’l-vücûhi’ş-şer‘iyye alâkam kalmadı mezbûr [5a] Mehmed Efendi’nin [mülk-i] müşterâsıdır keyfemâ yeşâ ve hasbemâ yehtâr mutasarrıf olsun dedi dedikde mukırr-ı mezbûrun minvâl-i muharrer üzre bi’l-vekâle cereyân eden ikrârını mezbûr Mehmed Efendi bi’l-muvâcehe ve bi’l-müşâfehe tasdîk ve tahkīk etmeğin mâ vaka‘a bi’l-ibtigā ketb olundu. Fi’l-yevmi’s-sânî min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Süleyman Çelebi b. Osman, Mehmed Beşe b. Hasan, Ali Beşe b. Veli, Ramazan Halîfe b. Ahmed, Mehmed Bey b. Ahmed, Musa b. Derya, eş-Şeyh Mehmed b. Abdullah, Abdullah Efendi b. Ali ve gayruhüm mine’l-hâzırîn