Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 61 Hüküm no: 22 Orijinal metin no: [5a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İslâm Bey Evkâfı’na mütevelli olan Mustafa Efendi’nin önceki mütevelli Mehmed Çelebi ile hesaplaştığı Medîne-i Hazret-i Ebâ Eyyûb el-Ensârî’de merhûm İslâm Bey Evkāfı’na hâlen mütevellî olan fahrü’l-hutebâ Mustafa Efendi b. Mehmed nâm mütevellî meclis-i şer‘-i şerîf-i lâzımü’t-tevkīrde râfi‘-i hâze’l-kitâb sâbıkan evkāf-ı merkūmeye mütevellî olan Mehmed Çelebi b. Abdullah nâm râcil muvâcehesinde ikrâr-ı tâm ve takrîr-i kelâm edip bundan esbak mezbûr Mehmed Çelebi evkāf-ı merkūmeye mütevellî olup lâkin mezbûr azl ve yerine ben mütevellî nasb ve ta‘yîn olunmuşidim, el-hâletü hâzihî mütevellî-i sâbık mezbûr Mehmed Çelebi’nin muhâsebesini gördüğümde usûl ve gallât ve icârât mahsûlâtını bana yerli yeriyle gösterip benim dahi makbûlüm olmuşdur, hâlen mezbûr Mehmed Çelebi zimmetinde ancak mâl-ı vakf-ı mezbûrdan beş yüz akçe zuhûr etmekle mezbûr Mehmed Çelebi zimmetinde meblağ-ı merkūm beş yüz akçeden gayrı bir akçe ve bir habbe mâl-ı vakf-ı mersûmdan bâkī kalmadı dedikde mütevellî-i lâhık Mustafa Efendi’nin minvâl-i meşrûh üzre cârî ve sâdır olan ikrâr-ı meşrûhunu mütevellî-i sâbık Mehmed Çelebi vicâhen tasdîk ve şifâhen tahkīk etmeğin mâ hüve’l-vâki‘ bi’l-ibtigā ketb olundu. Fî evâili Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Mustafa Halîfe b. İlyas, Mehmed Efendi b. Nasuh Ağa, Ali Beşe b. Mustafa, Hüseyin Beşe b. Ali ve gayruhüm mine’l-hâzırîn