Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 62 Hüküm no: 23 Orijinal metin no: [5a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Hıristo’nun mülk menzilini Asam Ahmed Çelebi’nin para vakfına bey‘ bi’l-istiğlâl yoluyla sattığı Havâss-ı aliyye kazâsına tâbi‘ Avasya demekle ma‘rûf karyede sâkin Dimitri v. Hıristo nâm nasrânî meclis-i şer‘-i şerîf-i lâzımü’t-tevkīrde medîne-i Hazret-i Ebâ Eyyûb el-Ensârî’de merhûm Asam Ahmed Çelebi vakf eylediği nukūda hâlen mütevellî olan işbu hâmilü’l-kitâb Eyüb Çelebi b. Süleyman nâm kimesne mahzarında bi tav‘ihî ikrâr-ı tâm ve takrîr-i kelâm edip silk-i mülkümde münselik olup karye-i mezbûrede vâki‘ bir tarafdan Karakaş nâm zimmî mülkü ve bir tarafdan Osman b. Abdullah mülkü ve tarafeyni tarîk-i âm ile mahdûd ve mümtâz mülk menzilimi bi cümleti’t-tevâbi‘ ve’l-levâhık mütevellî-i mezbûr Eyüb Çelebi’ye beş bin fıddî râyic fi’l-vakt akçeye bi tarîki’l-istiğlâl bey‘ ve teslîm edip ol dahi minvâl-i muharrer üzre vakf-ı mezbûr mâlıyla iştirâ ve tesellüm ve kabz ve kabûl eyleyip semeni olan meblağ-ı mezbûru’n-na‘t beş bin akçeyi mütevellî-i mezbûr yedinden tamâmen ahz ü kabz eylediğimden sonra yine menzil-i mahdûd-ı mezkûru târih-i kitâb şehri gurresinden ba‘de’t-tahliye ve’t-tekābuz mütevellî-i mezbûr beher sene yedi yüz elli akçeden üç sene tamâmına değin iki bin iki yüz elli akçe icâre ile bana îcâr ve teslîm edip ben dahi vech-i mübeyyen üzre istîcâr ve tesellüm ve kabûl eyledim dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’r-râbi‘ min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Veli Çelebi b. İsâ el-Kâtib, Ahmed Çelebi b. Eyüb, Mustafa Beşe b. Abdullah çukadâr, Abdullah Beşe b. İskender, Hüseyin Çelebi b. Ali ve gayruhüm mine’l-hâzırîn