Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 66 Hüküm no: 28 Orijinal metin no: [6a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Petro v. Göka’nın mülk menzilini Panko v. Decka’ya sattığı Vilâyet-i Rumeli’nde Premedi kazâsına tâbi‘ İzgoraliç nâm karye sükkânından Petro v. Göka nâm zimmî meclis-i şer‘-i şerîf-i lâzımü’t-tevkīrde işbu râfi‘ü’l-vesîka Panko v. Decka nâm zimmî muvâcehesinde bi’t-tav‘ ve’r-rızâ ikrâr ve i‘tirâf edip silk-i mülkümde münselik olup bir tarafdan Kika Yano mülkü ve bir tarafdan Panko Göka mülkü ve bir tarafdan diğer Panko Göka mülkü ve bir tarafdan tarîk-i âm ile mahdûd bir bâb tahtânî odayı ve bir samanlığı ve bir harman yerini ve zât-ı eşcâr-ı müsmire ve gayr-ı müsmire bahçeyi ve bir dip ceviz ağacını müştemil mülk menzilimi cemî‘ tevâbi‘ ve levâhıkı ile merkūm Panko’ya dört bin cedîd akçeye tarafeynden îcâb ve kabûlü hâvî bey‘-i bâtt-ı kat‘î ile bey‘ edip ol dahi vech-i muharrer üzre iştirâ ve kabûl eyleyip semeni olan dört bin mezbûru’n-na‘t akçeyi merkūm Panko yedinden tamâmen alıp kabz eylediğimden sonra mebî‘-i mahdûd-ı mezkûru mahallinde zabt ve tasarrufa tarafımdan merkūm Panko’yu taslît eyledim dedikde gıbbe’t-tasdîki’ş-şer‘iyyi’l-vicâhî mâ vaka‘a gıbbe’t-taleb ketb olundu. Fi’l-yevmi’s-sâdis min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Ali b. Mustafa, Hüseyin b. Ali, Dilâver b. Abdullah, Abdullah b. İskender ve gayruhüm mine’l-hâzırîn Panko, Göka, Kika, Pano, Muço, Kika, Panko, Göka, Kiro, Kika, Tucko, Kika, Kanoş, Göka, Kirko ve Sika, Panko, Sika, Payo, Aleksi ve gayr