Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 67 Hüküm no: 30 Orijinal metin no: [6b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Lefteri v. Mihayil’in mülk menzili ile bahçesini Dimitri v. Polharoni’ye sattığı Vilâyet-i Rumeli’nde Mezistre kasabası mahallâtından Parol nâm mahalle sâkinlerinden Lefteri v. Mihayil nâm zimmî meclis-i şer‘-i şerîf-i lâzımü’t-tevkīrde işbu râfi‘ü’s-sifr Dimitri v. Polharoni nâm nasrânî muvâcehesinde bi’t-tav‘ ve’r-rızâ ikrâr ve i‘tirâf edip silk-i mülkümde münselik olup mahalle-i mezbûrede vâki‘ bir tarafdan Dimitri İstematopulo mülkü ve bir tarafdan Kosta mülkü ve bir tarafdan Manol Ronebli mülkü ve bir tarafdan tarîk-i âm ile mahdûd bir bâb fevkānî ve bir bâb tahtânî odaları ve samanlığı ve on dip dut ağacını müştemil mülk menzilimi cemî‘ tevâbi‘ ve levâhıkı ile ve yine kasaba-i mezbûre tevâbi‘inden Apayani nâm karyede vâki‘ etrâf-ı erba‘adan alay beyi tarlası ve Kaloyor ve Yorgo Kofra bahçeleri ve tarîk-i âm ile mahdûd ve mümtâz zât-ı eşcâr-ı müsmire ve gayr-ı müsmireyi ve bir bâb tahtânî odayı müştemil bir kıt‘a mülk bahçemi dahi merkūm Dimitri’ye yüz kıt‘a riyâlî kebîr guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyleyip semeni olan merkūmü’l-vasf yüz guruşu mersûm Dimitri yedinden bi’t-tamâm alıp kabz eylediğimden sonra mebî‘ayn-i mezkûreyni mahallinde zabt ve tasarrufa tarafımdan merkūm Dimitri’yi taslît eyledim dedikde gıbbe’t-tasdîki’ş-şer‘iyyi’l-vicâhî mâ vaka‘a bi’l-ibtigā ketb olundu. Fi’l-yevmi’s-sâbi‘ min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Ali b. Mustafa, Mustafa Beşe b. Abdullah, Abdullah b. İskender, Dilâver b. Abdullah ve gayruhüm mine’l-hâzırîn İlya, Todori, Hıristo, Felo, Kostantin ve gayr