Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 68 Hüküm no: 31 Orijinal metin no: [6b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Ali’nin mülk menzilini Ahmed Beşe b. Mahmud’a sattığı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî- mahallâtından Otakçılar mahallesinde sâkin Ahmed Çelebi b. Ali meclis-i şer‘-i şerîf-i lâzımü’t-tevkīrde işbu râfi‘ü’l-kitâb Ahmed Beşe b. Mahmud nâm kimesne mahzarında bi’t-tav‘i’s-sâf ikrâr ve i‘tirâf edip silk-i mülkümde münselik olup mahalle-i mezbûrede vâki‘ iki tarafdan Mehmed Çelebi b. Hasan mülkü ve bir tarafdan imâma meşrût menzil ile Oruc Ağa çayırı ve bir tarafdan tarîk-i âm ile mahdûd bir bâb tahtânî odayı ve bir sofayı ve cüneyneyi müştemil mülk menzilimi cemî‘ tevâbi‘ ve levâhıkı ile mezbûr Ahmed Beşe’ye dört bin beş yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm ve kabz ve kabûl eyledikden sonra semeni olan mezbûru’n-na‘t dört bin beş yüz akçeyi mezbûr Ahmed Beşe yedinden tamâmen ahz ü kabz eyledim ba‘de’l-yevm mârrü’z-zikr menzilde vechen mine’l-vücûhi’ş-şer‘iyye alâkam kalmadı mezbûr Ahmed Beşe’nin mülk-i müşterâsıdır keyfemâ yeşâ ve yehtâr mutasarrıf olsun dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fi’l-yevmi’s-sâbi‘ min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Ali Efendi b. Himmet el-İmâm, Mehmed b. Sefer el-İmâm, Receb Beşe b. Mustafa, Selim Beşe b. Ali, Murad Beşe b. Abdullah er-Râcil, Mustafa b. Halil el-Müezzin, Mehmed b. Ali, Mahmud Çelebi b. Mustafa ve gayruhüm mine’l-hâzırîn