Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 68 Hüküm no: 32 Orijinal metin no: [6b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kondile bt. Yani’nin mülk menzilini Franko v. Nikola’ya sattığı Vilâyet-i Rumeli’nde Kerpiniş kazâsına tâbi‘ Cermahorya nâm karye sâkinelerinden Kondile bt. Yani nâm nasrâniye tarafından bey‘-i câ’i’z-zikre vekîl olup Danyal v. Dimo ve Miho v. Polo nâm zimmîler şehâdetleriyle şer‘an vekâleti sâbite olan Nikola v. Yorgi nâm vekîl zimmî meclis-i şer‘-i şerîf-i ezherde [7a] işbu râfi‘ü’l-vesîka Franko v. Nikola nâm zimmî muvâcehesinde bi’l-vekâle ikrâr ve i‘tirâf edip müvekkilem mezbûre emlâkinden karye-i merkūmede vâki‘ bir tarafdan Nikola Pavlaki mülkü ve bir tarafdan Miho Pavlaki mülkü ve tarafeyni tarîk-i âm ile mahdûd bir bâb tahtânî odayı ve zât-ı eşcâr-ı müsmire ve gayr-ı müsmire bahçeyi müştemil mülk menzilini cemî‘ tevâbi‘ ve levâhıkı ile mezbûr Franko’ya üç bin altı yüz cedîd akçeye bey‘-i bâtt-ı kat‘î ile bey‘ edip ol dahi vech-i muharrer üzre iştirâ ve kabûl eyleyip semeni olan meblağ-ı mezbûru merkūm Franko yedinden tamâmen ahz ü kabz eylediğimden sonra mebî‘-i mahdûd-ı mezkûru mahallinde zabt ve tasarrufa mersûm Franko’yu taslît eyledim dedikde gıbbe’t-tasdîki’ş-şer‘iyyi’l-vicâhî mâ vaka‘a bi’l-ibtigā ketb olundu. Fi’l-yevmi’s-sâmin min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Abdullah b. İskender, Dilâver b. Abdullah, Hüseyin b. Ali, Bayram b. Mehmed ve gayruhüm mine’l-hâzırîn Danyal, İsterati, Yorgo, İsterati, Kerci, İsterati, Todori, Pavlaki, Nika, Agori ve gayr