Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 69 Hüküm no: 33 Orijinal metin no: [7a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zafire bt. Dimitri’nin mülk menzili ile dalyan hissesini kocası Göni v. Toka’ya sattığı Havâss-ı aliyye kazâsına tâbi‘ kasaba-i Çekmece-i suğrâ sâkinelerinden Zafire bt. Dimitri nâm nasrâniye meclis-i şer‘-i şerîf-i lâzımü’t-tevkīrde zevci işbu râfi‘ü’l-vesîka Göni v. Toka nâm zimmî muvâcehesinde bi tav‘ihâ ikrâr ve i‘tirâf edip silk-i mülkümde münselik olup kasaba-i mezbûrede vâki‘ bir tarafdan kenîse ve bir tarafdan Todoraki mülkü ve bir tarafdan Yani mülkü ve bir tarafdan tarîk-i âm ile mahdûd iki bâb fevkānî odaları ve altında ahırı ve müşterek su kuyusunu ve bahçeyi müştemil mülk menzilimi cemî‘ tevâbi‘iyle ve yine kasaba-i mezbûrede sâhil-i bahrda vâki‘ dalyanda olan rub‘ hisse-i şâyi‘amı dahi zevcim merkūm Göni’ye on bin beş yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm ve kabz ve kabûl eyledikden sonra semeni olan mezbûru’n-na‘t on bin beş yüz akçeyi mersûm Göni yedinden tamâmen ahz ü kabz eyledim ba‘de’l-yevm menzil-i mahdûd ile dalyanda olan rub‘ hissem zevcim mezbûr Göni’nin mülk-i müşterâsıdır keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîki’ş-şer‘iyyi’l-vicâhî mâ vaka‘a bi’t-taleb ketb olundu. Fi’l-yevmi’s-sâmin min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Yusuf Beşe b. Ali, Ali Beşe b. Abdullah, Mehmed Bey b. Mustafa, Süleyman Çelebi b. Ali, Muharrem Beşe b. Abdullah, Nasuh Çelebi b. Handan, Mehmed Ağa b. Mustafa, Ahmed Çelebi b. Mustafa, Hüseyin Çelebi b. Ali, İspandon, Manol, Trandafilo?, Bandiri?, Dimo, Dimitri, Zağiri, Dimo, Balıkçı Dimo, Kiryani, Mavridi, Todori ve gayruhüm mine’l-hâzırîn