Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 70 Hüküm no: 34 Orijinal metin no: [7a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Siyavuş Paşa Vakfı’na ait çeşmenin suyolunun tamiri için mütevelliye izin verilmesi Belde-i mübâreke-i hâlidiyye medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm ve mağfûrun-leh Siyavuş Paşa Vakfı’na bi’l-fi‘il mütevellî olan işbu hâmilü’l-kitâbi’l-müstetâb fahrü’l-emâsil ve’l-akrân el-Hâc Mustafa Ağa b. Abdülmennân nâm mütevellî meclis-i şer‘-i şerîf-i enver ve mahfil-i dîn-i münîf-i ezherde takrîr-i kelâm ve ifâde-i merâm edip merhûm-ı müşârun-ileyhin medîne-i mezbûrede medfûn olduğu türbesi duvarında hasbeten lillâhi te‘âlâ binâ eylediği çeşmede cereyân eden suyun yolu zikr olunan çeşmeden yine medîne-i mezbûrede başhâne dükkânı önüne varınca mürûr-ı eyyâm ile harâb olmağın tevliyet-i mahkiyem hasebiyle cânib-i şer‘-i şerîfden müceddeden binâya izin taleb ederim dedikde kıbel-i şer‘-i kavîmden vech-i muharrer üzre zikr olunan suyolunu mârrü’z-zikr çeşmeden başhâne dükkânı önüne varınca müceddeden binâya izin verilip mâ hüve’l-vâki‘ gıbbe’t-taleb ketb olundu. Fi’l-yevmi’t-tâsi‘ min Şa‘bâni’l-mu‘azzam min şuhûri sene hamsin ve sittîn ve elf. Şuhûdü’l-hâl: Mehmed Çelebi b. İbrahim el-Hâfız, Abdullah Halîfe b. Abdullah, Mehmed Beşe el-Câbi, Mustafa Çelebi el-Kâtib ve gayruhüm mine’l-hâzırîn