Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 70 Hüküm no: 35 Orijinal metin no: [7a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Receb’in tasarrufundaki tarlayı kiraladığı Ahmed’in vefatı üzerine sipahi vekili Şaban Bey’in başkasına tapu ile vermek istediği ve Mustafa’nın talebi ile men edildiği Vilâyet-i Anadolu’da Bolu sancağında vâki‘ Ulak? kazâsına tâbi‘ Boyalı nâm karye ahâlîsinden hâmil-i hâze’l-kitâb Mustafa b. Receb nâm kimesne meclis-i şer‘-i şerîfde karye-i mezbûre sipâhisi Mehmed Ağa nâm kimesne tarafından karye-i mezbûreyi zabt ve tasarrufa vekâlet-i mutlaka ile vekîli ve zikri câ’î tarlaya âti’l-beyân vechi üzre vâzı‘ü’l-yed idiği şer‘an zâhir ve müte‘ayyin olan Şaban Bey b. Muharrem nâm kimesne muvâcehesinde üzerine takrîr-i da‘vâ edip karye-i mezbûrede vâki‘ bir tarafı Himmet tarlası ve bir tarafı Mustafa b. Abdullah tarlası ve bir tarafı Derek tarlası ve bir tarafı Süleyman tarlası ile mahdûd bir kıt‘a mutasarrıf olduğum tarlamı bundan akdem bu husûs için İstanbul’a azîmet eylediğimde tarla-yı mezbûr boz ve hâlî kalmamak için yine karye-i mezbûre ahâlîsinden olup mukaddemâ fevt olan Ahmed nâm kimesneye ücret-i ma‘lûme ile verdiğimde ol dahi kabûl ve zirâ‘at edip hâsıl olan mahsûlâtdan vekîl-i mezbûr öşrünü alıp hâlî ve boz kalmış değil iken mücerred celâ-yi vatan etmişdir deyû bilâ-vech-i şer‘î mezbûr Ahmed’e tapu ile vermiş hâlen mezbûr Ahmed ölmeğle tarla-yı mezbûru âhara tapu ile [7b] vermek murâd edip vaz‘-ı yed eder suâl olunup kasr-ı yedine tenbîh ve ta‘arruzdan men‘ olunmak matlûbumdur dedikde, gıbbe’s-suâl vekîl-i mezbûr cevâbında fi’l-vâki‘ tarla-yı mezbûr hâlî ve mu‘attal kalmakla minvâl-i muharrer üzre mezbûr Ahmed’e tapu ile vermişidim hâlen mezbûr Ahmed bilâ-veledin zük[û]r fevt olmağla yine ol tarlamı âhara tapu ile vermek için vaz‘-ı yed eyledim deyû ikrâr lâkin mezbûr Mustafa’nın müteveffâ-yı mezbûra hâl-i sıhhatinde ücret ile verip ve hâsıl olan terekeden öşür aldığını münkir olıcak müdde‘î-i mezbûr Mustafa’dan da‘vâsına muvâfık beyyine taleb olundukda udûl-i ricâlden olup yine karye-i mezbûre sâkinlerinden Receb Bey b. Kalender ve Mehmed Efendi b. Eyüb nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘î-i mezbûr mukaddemâ İstanbul’a azîmet murâd eyledikde zikr olunan tarlayı müteveffâ-yı mezbûr Ahmed’e beher sene beşer keyl buğday ücret ile bizim huzûrumuzda îcâr ve teslîm mezbûr Ahmed dahi vech-i mübeyyen üzre istîcâr ve tesellüm ve kabûl edip ve hâsıl olan terekeden vekîl-i mezbûr öşrünü dahi almışidi biz bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle tarla-yı mezbûr müdde‘î-i merkūm yedinde ibkā olunmağla ol vechile merkūm Şaban Bey bî-vech ta‘arruzdan men‘ olunup mâ hüve’l-vâki‘ bi’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Yusuf Çelebi b. Zeynelâbidin, Mehmed Beşe b. Mahmud, Şaban b. Hasan, Ali Beşe b. Mustafa, Hüseyin Beşe b. Ali, Bayram el-Muhzır ve gayruhüm mine’l-hâzırîn