Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 71 Hüküm no: 36 Orijinal metin no: [7b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Fâtıma bt. Mehmed’in vârislerinin zevci Hüseyin Bey b. Abdullah’ın terekeden bazı eşyaları sakladığı iddiasıyla açtıkları davalarını ispat edemedikleri Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Hazret-i Emir Buhârî -hamâha’llâhu te‘âlâ bi lütfihi’l-cârî- mahallesinde sâkine iken bundan akdem müteveffât olan Fâtıma bt. Mehmed nâm hâtunun verâseti zevc-i metrûkü Hüseyin Bey b. Abdullah ile li ebeveyn kız karındaşı kızları Ümmühâni ve Rahime nâm hâtunlara münhasıra olduğu şer‘an zâhir ve müte‘ayyin oldukdan sonra mezbûretân Ümmühâni ve Rahime Hâtun meclis-i şer‘-i hatîr-i lâzımü’t-tevkīrde işbu hâmilü’l-vesîka mezbûr Hüseyin Bey muvâcehesinde her biri üzerine da‘vâ ve takrîr-i kelâm edip müteveffât-ı merkūmenin hîn-i vefâtında muhallefât-ı mevcûdesini alâ mâ farazallâhû te‘âlâ beynimizde tevzî‘ ve taksîm etmişidik lâkin mezbûr Hüseyin Bey müteveffât-ı mezbûrenin muhallefâtından iki beledî döşek ve bir yemeni yorgan ve iki yastık ve iki merdi? kilim ve bir yan keçesi ve bir tencere ve bir tavası? ve üç baklava tepsisi ve on üç sahan ve bir leğen ve bir ibrik ve üç güğüm ve iki kahve ibriği ve kırk zirâ‘ üstüpü ipliği ve bir makrama ve beş minder çadırını ve üç ihrâm ve iki tâbe ve iki kefgir ve iki kefgir sahan ve otuz sikke-i haseneyi kabz ve ketm edip hâlen eşyâ-i mezbûreden hisse-i şer‘iyyemizi taleb eylediğimizde mezbûr Hüseyin Bey te‘allül eder suâl olunup teslîme tenbîh olunmak matlûbumuzdur dediklerinde gıbbe’s-suâl mezbûr Hüseyin Bey cevâbında müteveffât-ı merkūmenin metrûkâtından ancak yirmi zirâ‘ üstüpü ipliği ile bir hamam tası almışdır deyû ikrâr, lâkin eşyâ-i mezbûre müteveffât-ı merkūmenin metrûkâtından olu[p] ketm eylediğini bi’l-külliye [inkâr edicek] mezbûretândan da‘vâlarına muvâfık beyyine taleb olundukda ikāmet-i beyyineden izhâr-ı acz edip istihlâf etmeğin fi’l-vâki‘ eşyâ-i mezbûreyi ketm edip müteveffât-ı merkūmenin metrûkâtından olmadığına yemîn teklîf olundukda yemîn billâhi te‘âlâ etmeğin mûcebiyle bî-vech mu‘ârazadan? men‘ olunup mâ hüve’l-vâki‘ gıbbe’t-taleb ketb olundu. Fi’l-yevmi’l-hâdî aşer min Şa‘bâni’l-mu‘azzam sene [10]65. Şuhûdü’l-hâl: Muharrirü’l-hurûf Mustafa Efendi b. Hüseyin?, Şeyh Mehmed Efendi b. Ramazan?, Mehmed Efendi b. Nasuh el-Kadı, Ali Beşe b. Mustafa, Hüseyin Çelebi b. Ali, Abdi el-Muhzır