Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 73 Hüküm no: 39 Orijinal metin no: [8a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bağcinâne Hâtun bt. Abdülmennân’ın Rus asıllı câriyesini vasiyet yoluyla azat ettiği Husûs-ı âti’z-zikrin mahallinde tahrîri iltimâs olunmağın kıbel-i şer‘den fahrü’l-kuzât Mevlânâ Mehmed Efendi b. Nasuh Ağa irsâl olunup ol dahi zeyl-i kitâbda mastûretü’l-esâmî olan müslimîn ile medîne-i Hazret-i Ebâ Eyyûb el-Ensârî’de merhûm Kiremitçi Süleyman Çelebi mahallesi sükkânından umdetü kuzâti’l-İslâm İbrahim Efendi’nin menziline varıp akd-i meclis eyledikde yine mahalle-i mezbûre sâkinelerinden Bağcinâne Hâtun bt. Abdülmennân meclis-i mezkûrda kendiye rıkkını mu‘terife olup orta boylu açık kaşlı gök elâ gözlü Rusiyyetü’l-asl olan hâmiletü hâze’l-kitâb Şahbaz bt. Abdullah nâm câriye-i memlûkesi mahzarında bi tav‘ihâ ikrâr ve i‘tirâf edip câriye-i mevsûfe-i merkūmeyi mevtimden kırk gün mukaddem âzâd olmak üzre tedbîr-i mukayyed ile müdebber eyledim kazâ-i nahb ve likā-i rab eylediğimde câriye-i mezbûre cemî‘ mâlımdan âzâd ve tahrîr ve sâir harâir-i asliyyât gibi hürre olsun dedikde mukırra-i merkūmenin minvâl-i meşrûh üzre cârî olan ikrârını câriye-i mezbûre bi’l-muvâcehe tasdîk ve bi’l-müşâfehe tahkīk etmeğin vâki‘-i hâli Mevlânâ-yı mezbûr mahallinde tahrîr ba‘dehû gelip meclis-i şer‘de alâ vukū‘ihî inhâ ve takrîr etmeğin mâ hüve’l-vâki‘ bi’l-ibtigā ketb olundu. Fi’l-yevmi’l-âşir min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: İbrahim Efendi b. Mahmud, Mustafa Efendi b. el-Hâc Receb, Mehmed Efendi el-İmâm, el-Hâc Ebîbekir el-Müezzin, Mahmud Beşe b. İbrahim, Mehmed Çelebi b. Ahmed Bey, Ahmed Bey b. Haydar, Ak Mehmed Çelebi b. Mehmed ve gayruhüm