Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 75 Hüküm no: 41 Orijinal metin no: [8a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hac dönüşü yolda vefat eden Mustafa Beşe’nin Hacı Nasuh b. Mustafa’ya emânet verdiği altınlarını vârislerinin teslim aldıkları Bundan akdem hacc-ı şerîfden gelirken vefât eden el-Hâc Mustafa Beşe b. Abdullah nâm müteveffânın verâseti zevce-i metrûkesi Cenâne bt. Abdullah nâm hâtun ile mukarrun leh bi’n-neseb cihetinden li ebeveyn er karındaşı oğlu İslâm Beşe b. Abdullah nâm kimesneye münhasıra olduğu şer‘an zâhir ve müte‘ayyin oldukdan sonra merkūm İslâm Beşe kendi tarafından asâleten ve mezbûre Cenâne tarafından husûs-ı âti’z-zikre vekîli olup mezbûrenin zâtını ma‘rifeti şer‘iyye ile ârifân olan Abdülbâkī Efendi b. Mustafa ve Mehmed Çelebi b. Ahmed şehâdetleriyle şer‘an vekâleti sâbite olmağın vekâleten meclis-i şer‘-i şerîf-i lâzımü’t-tevkīrde işbu râfi‘ü’l-kitâb el-Hâc Nasuh b. Mustafa nâm kimesne mahzarında bi’l-vekâle ve bi’l-asâle ikrâr-ı tâm ve takrîr-i kelâm edip mûrisimiz müteveffâ-yı mezbûr el-Hâc Mustafa Beşe hâl-i hayâtında mukaddemâ el-Hâc Nasuh’un yedine yüz yirmi aded tâmmü’l-vezn sahîhü’l-ayâr altın alâ tarîki’l-vedî‘a vaz‘ ve teslîm ol dahi vech-i meşrûh üzre kabz ve tesellüm etmişidi el-hâletü hâzihî zikr olunan altını mezbûr el-Hâc Nasuh yedinden bi’t-tamâm ve’l-kemâl ahz ü kabz eyledik ba‘de’l-yevm müteveffâ-yı mezbûrun merkūm el-Hâc Nasuh zimmetinde bir akçe ve bir habbesi bâkī kalmamışdır dedikde, mukırr-ı mezbûr İslâm Beşe’nin asâleten ve vekâleten minvâl-i mübeyyen üzre cârî ve sâdır olan ikrârını el-mukarru lehü’l-mezbûr vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’l-ışrîn min şehri Recebi’l-ferd li sene hamsin ve sittîn ve elf. Şuhûdü’l-hâl: El-Hâc Mahmud Bey b. Mirza, Hasan Çelebi b. Mustafa el-İmâm, Mehmed Çelebi b. Ahmed, Ahmed Bey b. Haydar, Mehmed Efendi b. Yusuf el-İmâm, Mehmed Beşe odabaşı, Mustafa Çelebi el-Attâr, Üveys Beşe b. Mehmed, Mustafa Beşe b. Abdullah çukadâr, Abdullah Beşe b. İskender ve gayruhüm mine’l-hâzırîn