Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 77 Hüküm no: 44 Orijinal metin no: [8b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çayırda silahla öldürülmüş olarak bulunan İsteyan ile balta ile yaralanan Miho v. Dedo’nun durumlarının keşf edilmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Süleyman Subaşı mahallesi sâkinlerinden olup zikri câ’î çayırın otlağını iştirâ eden işbu râfi‘ayi’l-kitâb Mahmud Beşe b. Abdullah ve Hasan Beşe b. Bâli nâm kimesneler meclis-i şer‘-i şerîf-i lâzımü’t-tevkīrde her biri takrîr-i kelâm ve ta‘bîr ani’l-merâm edip medîne-i mezbûre tevâbi‘inden Terkos nâhiyesinde Mağlova kemeri kurbunda vâki‘ Nakkaş Paşazâde Çayırı demekle ma‘rûf çayırda târih-i kitâbdan bir gün mukaddem İsteyan nâm zimmî maktûl ve Miho v. Dedo nâm zimmî mecrûh bulunmuşdur, hâlen cânib-i şer‘-i şerîfden üzerlerine varılıp eser-i cerhleri keşf ve müşâhede olunmak murâdımızdır dediklerinde, kıbel-i şer‘-i kavîmden fahrü’l-kuzât Mevlânâ Mehmed Efendi b. Nasuh irsâl olunup ol dahi zeyl-i kitâbda mastûretü’l-esâmî müslimîn ile üzerlerine varıp keşf [9a] olundukda merkūm İsteyan’ın ensesinde ve sol kulağı yanında ve perçemi içinde âlet-i harb darbından katîl olduğu müşâhede olunup ve mersûm Miho’nun ağzında balta darbından bir dişinden gayrı dişleri kırılıp mecrûh olduğu müşâhede ve mu‘âyene olundukdan sonra merkūm Miho’ya cârihin kimdir deyû suâl olundukda cevâbında târih-i kitâb gecesi otlakçı mezbûr Hasan Beşe bi ga[y]r-ı hak vech-i muharrer üzre beni balta ile urup mecrûh eyledi dedikde, husûs-ı mezbûru Mevlânâ-yı mezbûr mahallinde tahrîr ba‘dehû gelip meclis-i şer‘de alâ vukū‘ihî [inhâ] ve takrîr etmeğin mâ vaka‘a bi’l-ibtigā ketb olundu. Fi’l-yevmi’s-sânî aşer min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Habib Hoca b. Ali, Hızır Beşe b. Mustafa, Mustafa Beşe b. Abdullah, İbrahim b. Bayram, Hüseyin Beşe b. İbrahim mandıracı, Ali Beşe b. Ahmed, Hüseyin Çelebi b. Bayram, Hüseyin Bey b. Abdullah, Veli b. Abdullah, Ali Beşe b. Abdullah, Mustafa Beşe b. Abdullah çukadâr, Abdullah Beşe b. İskender ve gayruhüm mine’l-hâzırîn